30 April 2011

အမေ မဖတ်သင့်တဲ့ ကျွန်မရဲ့ စာမျက်နှာတစ်စ


အဆုံးစွန်သော အရူးစိတ်နဲ့ ဒီထက်နေမြင့်လို့ မဖြစ်နိုင်တော့တာမို့ရေနက်ထဲ စဆင်းပါရစေတော့။ ရှင်သန်ခွင့်ကို အမေ့လက်က နှုတ်ယူပြီးသွေးရူးသွေးတန်းလက်အစုံနဲ့ သေတွင်းတူးကြည့်ပါဦးမယ်။ ဘဝကူးမပြောင်းခင် အသက်ဝဝရှုချင်လှပြီလေ။ တကယ်ပဲ ဆက်လက်သည်းမခံနိုင်တော့ပါ။ ဆတ်ဆတ်ထိမခံနိုင်အောင် ထိခိုက်လွယ်လွန်းတာ၊ မတိကျမပြတ်သားနိုင်တာ၊ လူတွေကို အရေးစိုက်လွန်းကာ ကိုယ့်ဟန်မူရာကို သတိထားလွန်နေတာ၊ ကိုယ့်ကိုကိုယ်ယုံကြည်မှု ချို့တဲ့တာ၊ ဆက်ဆံရေးကစလို့ အချစ်အဆုံး ဖူးပွင့်အောင် လုပ်ဆောင်နိုင်စွမ်းမဲ့တာ၊ အောင်မြင်မှုတွေ ဘယ်လိုရရ စိတ်ချကျေနပ်မှု ချို့ယွင်းနေတာ ၊ အရာရာမှာ စိတ်မလုံခြုံမှုနဲ့ ရှင်သန်နေရတာ….။ ဒီ ကျိုးပဲ့နေတဲ့ အနာတရများစွာဟာ ကျွန်မဘဝကို ထောက်ကန်ထားတဲ့ ဆူးချက်များသာ။

အရာရာကို ထိတ်လန့်အားငယ်ရင်း စိတ်ဆင်းရဲပင်ပန်းမှုတွေနဲ့ သမီး အသက်မရှင်ချင်တော့ဘူး မလေး…။
မလေး…။
ဒီအခေါ်အဝေါ်ကစလို့ ကျွန်မကို မျက်ရည်စိမ့်စိုစေမြဲ။ အမေ့ကို ဘယ်တုန်းကမှ အမေလို့ ကျွန်မ ခေါ်ခွင့်မရှိခဲ့ပါဘူး။ “မလေး” တဲ့ ။ အမေလို့ခေါ်ဖို့ ဘယ်သူမှ သင်ကြားမပေးခဲ့သလို ဦးလေး၊အဒေါ်တွေ ခေါ်သလို ကျွန်မတို့ညီအစ်မ သုံးနှုန်းခဲ့ကြရ။ ဒီနာမ်စားတစ်ခုဟာ အမေ့အတွက် အရေးထားစရာ ကိစ္စမဟုတ်ပေမယ့် ကျွန်မအတွက်တော့ အမည်ခေါ်ခွင့်ကလေးကလည်း ဒဏ်ရာနက်နက်ဆိုတာ အမေ မသိခဲ့ဘူးရယ်။ မလေးဘယ်တုန်းကမှ သမီးစကားကို နားစိုက်မထောင်ခဲ့ဘူးပဲနော်။ ကျွန်မရဲ့ ဒီတရားဝင်ခွင့်ပန်ကြားချက်များကို အမေကြားပါ့မလား။ ကျွန်မ မမှန်းဆနိုင်ပါ။

ဒါပေမယ့် မလေး ခုချိန်ကစပြီး သမီးရဲ့ရောဂါစုကို လူဘုံအလယ်မှာ ကုသတော့မယ်။ သမီးရဲ့ရောဂါလက္ခဏာတွေကိုဆေးစစ်ပြီး အစဖျောက်တော့မယ်။ခေါင်းငုံ့နှုတ်လုံတဲ့ သမီးလိမ္မာမျက်နှာဖုံးနဲ့ ဆက်လက် အရူးရင့်လို့ မဖြစ်တော့လို့ပါ မလေး။ အခုလိုသေငင်ဇောမျောနေချိန်မှာ ဓာတ်ကြမ်းတိုက်မှ လွတ်မြောက်မှာ မိုို့လို့ပါ။ တစ်ကြိမ်တစ်ခါလေးဖြစ်ဖြစ် ကြည်ကြည်လင်လင်လေး သမီး ပြုံးပါရစေ။

ဒါကြောင့် ခုချိန်မှာ Karyl Mcbride ရဲ့ “ Will I Ever Be Good Enough?” {Healing the Daughters of Narcissistic Mothers} စာအုပ်ဟာ ကျွန်မအတွက်နောက်ဆုံးကုထုံးပါပဲ။ ဘာဖြစ်လို့လဲ ဆိုရင်ဖြင့် စိတ်ရောဂါအထူးကုတွေနဲ့ ကျွန်မ မဆွေးနွေးရဲသေးဘူး။ ငယ်စဉ်ကတည်းက အမေ့အကြောင်းဝေဒနာကို ရင်ဖွင့်ရတာ မကောင်းမှုလို့ ထင်ခဲ့မိတာ။ အလွန်တရာမြင့်မြတ်ကြီးကျယ်တဲ့ အမေ့မေတ္တာဖွဲ့တွေက ကျွန်မရဲ့ပျော်ရွှင်ခြင်းတွေကို တိုက်ခိုက်ခြောက်လှန့်ခဲ့တယ်။ မိန်းမဆိုးဖြစ်မှာ ကျွန်မ သိပ်ကြောက်တယ်။ လိမ္မာချင်တဲ့ သမီးကောင်းဖြစ်ချင်သူမို့ တရားစခန်းတွေ ဝင်ပြီး ဘုရားကု ကုခဲ့ရဲ့။

မလေးပြောခဲ့ဖူးတယ်နော်။ “ကိုယ့်သမီးတွေကို တရားစခန်းဝင်နေတယ်လို့ပြောရမှာ သိပ်ရှက်တယ်။ သူငယ်ချင်းတွေက ယူ့သမီးက depression ဝင်နေလားလို့ပြောကြတယ်” တဲ့။ ဒါပေမယ့် ဘာကြောင့် ကျွန်မ တရားစခန်းတွေဝင်ခဲ့တယ်ဆိုတာ အမေ မမေးခဲ့ပါဘူး။ အမှန်စကားဆိုရရင် ၁၆နှစ်အရွယ် မိန်းကလေးအနေနဲ့ တရားစခန်းရောက်သွားခြင်းမှာ  နိဗ္ဗာန်လိုချင်လို့ မဟုတ်ခဲ့ဘူးရယ်။ “အမေ့မေတ္တာကို မယုံကြည်သူဟာ ဘယ်သူ့မေတ္တာမှ မယုံကြည်ဘူး”လို့ စာအုပ်တွေထဲကပြောတဲ့အခါ ကျွန်မ အကြောက်လွန်သွားခဲ့တယ်လေ။ ချစ်ခြင်းမေတ္တာကိုမှ မယုံကြည်ရရင်လောကအလယ်မှာ သမီးဘယ်လိုရှင်သန်ရတော့မှာလဲ မလေး။

ဒါကြောင့် ဘုရားရဲ့မေတ္တာတော် အရိပ်ခိုကာ ဆောက်တည်ရာရအောင် ကျွန်မ ကြံဆောင်ခဲ့တာရယ်။ ကျွန်မ လူဖြစ်ချင်သေးတယ်။ စိတ်ဓာတ်ပြည့်ဝတဲ့ လူတစ်ယောက်ဖြစ်ဖို့ ကျွန်မမှာ အခွင့်ရှိတယ်မဟုတ်လား။ မနက်ခင်းတွေ သန့်စင်ဖို့ ကြိုးစားခဲ့။ အရိပ်မည်းအောက်က လွတ်မြောက်ဖို့ လုံ့လထုတ်ခဲ့။ ကြည်ကြည်လင်လင်ရယ်မောနိုင်အောင် အားကုန်လှုပ်ရှားခဲ့။အမုန်းရဲ့ စနက်အောက်က ရုန်းကန်ထွက်ပြေးခဲ့။ ဒါပေမယ့် သေလုမတတ် နည်းမျိုးစုံစမ်းသပ်ခဲ့လည်း ကျွန်မ မအောင်မြင်ခဲ့ပါ။

ဆယ်စုနှစ်တစ်ခု ကျော်ပြီးတဲ့တိုင်အောင် တပါးသူတွေရဲ့ ချစ်ခြင်းစကားတွေကို သံသယထားနေဆဲရယ်။ ဒါဟာ သဘာဝလား။ တကယ်ပါ။ သိပ်ချစ်ခဲ့ပေမယ့်လည်း အချစ်စာမေးပွဲမှာ နလန်မထူအောင် ကျရှုံးခဲ့ပါပြီ။ မေတ္တာလေးတစ်စတောင် ချစ်ခဲ့သူနားလည်အောင် ပုံဖော်နိုင်တဲ့သူ ကျွန်မ မဟုတ်ခဲ့ပါဘူး။ ဒီလို မငိုနိုင် မရယ်နိုင်တော့အောင် စိတ်ဓာတ်ပြိုလဲခဲ့သူကို ခယ်ရိုလ်ရဲ့ စာအုပ်က မျက်ရည်စိမ့်စိုစေနိုင်ခဲ့တာ။

အနာနဲ့ဆေး တည့်ခဲ့ပြီလား။ ဒီစာအုပ်က အတ္တဝါဒီမိခင်တွေကြောင့်ဖြစ်ခဲ့တဲ့ သမီးတွေရဲ့ စိတ်ကျန်းမာရေးကို ဒီစာအုပ်လေးက ကုသပေးနိုင်မယ်လို့ ယုံကြည်မိရဲ့။ ဒီလိုဆိုလို့ အမေ့ကို တကိုယ်ကောင်းသမားလို့ စွပ်စွဲတာ မဟုတ်ရပါဘူး တကယ်ပါ။ ကျွန်မတို့ ညီအစ်မကို အဒေါ်တွေလက်မှာ လွှဲအပ်ခဲ့ခြင်းဟာ တရပ်တကျေးမှာ အစိုးရတာဝန်ထမ်းနေခြင်းကြောင့်လားလို့ ဆိုနိုင်ပေမယ့် သမီးတွေနဲ့ပက်သက်ပြီး စိတ်ဝင်စားမှု နည်းပါးခဲ့တာတော့ အမှန်ရယ်။ ကျွန်မတို့ ညီအစ်မတွေ ငယ်စဉ်က ဘယ်နှစ်တန်းတက်နေတယ်ဆိုတာ အမေမှန်အောင် မပြောနိုင်ခဲ့သလို အမေအလည်လာတဲ့အခါ ဝယ်လာတဲ့ အဝတ်တွေဟာ အမြဲပဲသေးငယ်နေခဲ့တာ။တစ်နှစ်တစ်ခါတောင် ဖုန်းမခေါ်ခဲ့တဲ့ အမေဟာ စာအုပ်ထဲကလို စိတ်လှုပ်ရှားမှုချို့တဲ့သူလား။ ဒါမှမဟုတ် ကျွန်မကပဲ သိပ်အချစ်ခံလိုလွန်းသူလား။ ကျွန်မရဲ့တောင့်တလိုအင်တွေပဲ သိပ်များခဲ့သလား ။ငွေကြေးထောက်ပံ့ရုံနဲ့မေတ္တာပြသခြင်းဟာ ပြီးသွားပြီလား။

သမီး အချစ်သိပ်ငတ်ပါတယ် မလေး။ ဒီလိုဖြောင့်ချက်ကို အမေ့ကို ကျွန်မ ရင်ဖွင့်မဆိုခဲ့ပေမယ့်မေတ္တာကို လျစ်လျူမရှုခဲ့သလို အရေးမထားသလိုနဲ့ရောင့်ရဲနိုင်သူလည်း မဟုတ်ခဲ့ပါ။တောင်းယူမှ ရမယ့်မေတ္တာကရုဏာလေးတဆုပ်တဖဲ့အတွက် မာနထားခဲ့မိတာ အမှားလား။ တစ်သက်လုံး ကျွန်မ အပြစ်ဖြစ်သွားပြီလား။အမေဆိုတာ သမီးအတွက် စံနမူနာတဲ့လေ။ ဒီစံကလေးသာ ပြိုကွဲသွားရင် ချစ်သူ၊ဇနီးထားလို့ သူငယ်ချင်းဖြစ်ဖို့ အတွက်တောင် စိတ်ပိုင်းဆိုင်ရာ ဖွံ့ဖြိုးဖို့ ခက်သွားပြီတဲ့။ ကျွန်မရဲ့ ကံကြွေးတွေပဲလား။ဒါပေမယ့် လက်မခံနိုင်သေးဘူး။

ဆိုရိုးတွေလည်း ရှိပြန်တယ်။ အမေကို မချစ်တတ်သူဟာ ဘယ်သူ့ကိုမှ မချစ်တတ်ဘူးတဲ့။ ဟင့်အင်း။ အမေနဲ့တကွ လူတစ်ချို့ကို ကျွန်မတကယ်ချစ်ပါတယ်။ ဒါပေမယ့် အမေ မသင်ကြားခဲ့တဲ့အတွက် ချစ်ခြင်းကို ဘယ်လိုပုံဖော်ကာ ခင်ကျင်းရမလဲဆိုတဲ့ပညာ ကျွန်မ မတတ်ကျွမ်းခဲ့ဘူးရယ်။ ဘာပဲဖြစ်ခဲ့ ကြုံခဲ့ အမေ့ကို ကျွန်မ သိပ်ချစ်ပါတယ်။ ဒါဟာ ဆင်ခြင်ဥာဏ်နဲ့ ဇွတ်မှိတ်ထားတဲ့ ချစ်ခြင်းလား ဆိုတာ ကျွန်မ အသံကို ကျွန်မ ကြားခွင့်ရဖို့ အချိ်န်ကျပြီလေ။ သမီး လူပီပီသသ ရှင်သန်ချင်သေးတယ် မလေးရယ်။ …။




(ဆက်ရန်…)

မယ်ကိုး

17 April 2011

စုန်းစားခံရသူ


အိပ်ငိုက်နေတဲ့ ကမ်းခြေဝန်းကျင်မှာ ဦးထုပ်ကို ခပ်ငိုက်ငိုက်ဆောင်းထားတဲ့ လူတစ်ဦးဟာ ဆံပင်ရှည်တွေမျောလွင့်ကာ ပျံသန်းသွားတဲ့ သူ/သူမကို ကောင်းကင်ထက်မှာ မြင်လိုက်စဉ်မှာ (အများသူငါအတွက်) အလွန့်တရာ သေးဖွဲသိမ်နုပ်သော လှောင်ပြောင်ရယ်မောဖွယ် အခြင်းအရာတစ်ခု စတင်ပေါ်ပေါက်လာခဲ့ပါတယ်။

ကရောသောပါးပြေးလာကြတဲ့ ငှက်တစ်အုပ်ကို ဖျက်ကနဲမော့အကြည့်မှာ မြင်လိုက်ရတဲ့ လျှပ်တပြက်ပုံရိပ် ။….။အံ့သြငေးကြောင်မှုနဲ့ ဦးထုပ်ကိုပင် ဆွဲချွတ်ကာ အသေအချာကြည့်ပြီးမှ ကောက်ချက်ချဆုံးဖြတ်နိုင်ခဲ့တာ။“ ဒါ… စုန်းပဲ ” သူ ခပ်တိုးတိုး ရေရွတ်တယ်။ အသေအချာပဲ ကဝေ။ ပျော်ရွှင်မှု၊ ကြည်နူးခြင်း။ဒီနောက်ကြည်နူးဝမ်းသာစိတ်နဲ့ ချစ်သောသူတွေဆီ ခပ်သွက်သွက်ဖုန်းခေါ်ပြီး အဆက်အစပ်မဲ့ အစီအစဉ်မတည့် ရေရွတ်မိသွားခဲ့။

“ခုနက တွေ့လိုက်တာ….. ” စကားဆုံးတာနဲ့ တပြိုင်နက် သူ မမျှော်လင့်ထားတဲ့ မုန်တိုင်းက အရှိန်ပြင်းပြင်းသူ့ရင်ကို ဝင်ဆောင့်တဲ့အခါ သူ့ခြေများပင် ယိမ်းယိုင်သွားရ။အော်ဟစ်လှောင်ပြောင်သံများ။ တုံ့ပြန်မှုအဖြစ် သူလက်ခံရရှိလေပြီ။ ရုတ်တရက်အငိုက်မိသွားပေမယ့် အသက်ဝဝရှုကာ တံတွေးကို မြိုချလိုက်ရင်း အလဲထိုးခံလိုက်ရတဲ့စကားလုံးတွေကို ပြန်လည်ထူထောင်ကြည့်ရတာပ။

“စုန်းပဲ သေချာတယ်။ မျက်လုံးတွေက နက်ပြာရောင်တောက်တောက် ။ ပါးပြင်မှာ သွေးကြောတွေ အမျှောင်းလိုက်နဲ့… ကြောက်စရာသိပ်ကောင်းတယ်” သူထပ်မံရရှိလိုက်တာ ပိုလို့ကျယ်လောင်တဲ့ လှောင်ပြောင်ရယ်မောသံများ။ ရင်ခုန်နှုန်းဟာ အချိုးမကျဖြစ်လာကာ ဒေါသလည်း သူ့ရင်တွင်းကို ရောက်ရှိလာပြီ။တော်တော့။ တော်သင့်ပြီ။ သူ ခပ်ကျယ်ကျယ်အော်ဟစ်လိုက်လည်း ကံဆိုးစွာပင် သူ့အသံသူ မကြားရ ။ ကိစ္စမရှိဘူး။ ဇွဲကောင်းသူမို့ အပိုင်းပိုင်းအပဲ့ပဲ့ဖြစ်ကာ ဟိုသည်တစ်စပျံ့လွင့်နေတဲ့ အတည်ပြုချက်တစ်ခုကို လိုက်လံစုစည်းဖို့ အားယူလိုက်ပြန်တာ။

ဒါပေမယ့် မညှာတာတတ်သော စူးရှရှအသံတစ်မျှင်က သူ့စကားကို သရော်စော်ကားနဲ့ ဖြိုခွဲခြေမွပစ်လိုက်ရဲ့။ “စုန်းဆိုတော့ ကာတွန်းတွေထဲကလို နှာယောင်ကောက်ကောက် ရုပ်ဆိုးဆိုးအဘွားကြီးလား။ ဦးထုပ်ချွန်ချွန်နဲ့ တံမြည်စည်း စီးထားတာလား။ ကြောင်တစ်ကောင်ရော ပါလား” ။သွားပြီ။ သူ့သိက္ခာတွေ ရေထဲမျှောလိုက်ရတော့မလား။ အခြေအနေအရပ်ရပ်ကို သူ သုံးသပ်ဆက်စပ်ခြင်းငှာ မစွမ်းနိုင်တော့။ အခံရခက်ခြင်းတွေ ဆူဝေကာ ကမ်းခြေမှာ ခြေပစ်လက်ပစ် ထိုင်ချလိုက်မိပြီ။

“သူမဟာ စုန်းပဲ ။ ဒါပေမယ့် ဝတ်ရုံအမည်းကြီး ဝတ်ထားတာလည်း မဟုတ်ဘူး။ ဟယ်ရီပေါ်တာလို ဆေးကြိမ်လုံးလေး ဆောင်ထားပုံလည်း မရဘူး။ ဂါထာမန္တာန်တွေ မရွတ်ဘူး။ ဇီးကွက်လည်း မတွေ့ဘူး။ ဖီးနစ်ငှက်လွဲလို့ အနားမှာ ကျီးကန်းတောင် မရှိဘူး။  ဓာတ်လုံးတွေ ပြဒါးရှင်လုံးတွေ ရှိပုံလည်း မရဘူး။ ဒါပေမယ့် အကြည့်တွေက လူသတ်နိုင်တာ အမှန်ဘဲ။ ”

ယုံကြည်ချက်အမှုန့်များကို သူ သိမ်းဆည်းနေဆဲ နောက်ဆုံးအသံက သူ့ကို နလံမထူနိုင်အောင် အလဲထိုးပြန်ခဲ့။ “ပြက်လုံးက ရယ်စရာလည်း မကောင်းဘူး” တဲ့။ ဒီစကားဟာ သူ့အရှုံးကို အနားကွပ်လိုက်ပေးခြင်းလား။ သူ ပြိုကွဲမူးဝေနေပြီ။ သူ ဒီလောက် မနုံအပါဘူး။ လောကအထာတွေကို အထိုက်အလျှောက်တော့ ကျွမ်းဝင်ပါတယ်။ နေပါဦး။ ထူးဆန်းတဲ့ တိုက်ဆိုင်သိရှိမှုဆိုတာ သဘာဝတရားမှာ မဖြစ်နိုင်တော့ဘူးလား။

အာ။ သူ့အတွေးတွေ သိပ်ပြဇာတ်ဆန်နေပါလား။ ဒါပေမယ့် ဒါဟာ သစ္စာ။ အမှန်ရယ်သာ။ တားဆီးချိုးနှိမ်တဲ့ အသံလှိုင်းများကြားမှာပင် သူ့အတ္တဟာ အဟုန်ပြင်းပြင်းကြီးထွားလာခဲ့ပြီ။ ဘယ်လိုအကြောင်းကြောင့်မှ သူ့ဆိုစကားကို အငွေ့ပျံအောင် မဖျက်ဆီးနိုင်စေရ။
……………………………………………………………………………………………………………………................

သူကြိုးစားခဲ့ပါတယ်။မယုံနိုင်အောင်ပဲ ကြိုးစားခဲ့ပါတယ်။ လူတွေဘယ်လိုပဲ လှောင်ပြောင် ရယ်မောရှုံ့ချကဲ့ရဲ့လည်း သူ အမှန်တကယ်ကြိုးစားဆဲပါပဲ။ သူဟာ သူမကို ရှာရင်း စာတွေ ဖတ်ခဲ့တယ်။ သူမဟာ ဘယ်လိုစုန်းလဲ။

မြန်မာအယူအရ စုန်း (၇)မျိုး ရှိသတဲ့။သူမက သစ်သီးသစ်ပွင့်ကိုစားတဲ့ ခြေစုန်းတော့ မဟုတ်နိုင်။ သစ်သီးမှည့်အချိုအချဉ်ကိုစားတဲ့ ခေါင်းစုန်းလည်း မဖြစ်နိုင်။ အညစ်အကြေးတွေစားတဲ့ ကိုယ်စုန်းလို့လည်း မသတ်မှတ်နိုင်။ကိုယ်တိုင် မြင်ရ၊ထိရ နမ်းရှုပ်ရမှဖမ်းစားနိုင်တဲ့ အသွေး၊ အသား၊ အရေကိုစားသော မောက်လုံးစုန်းလား။ကိုယ်တိုင် မြင်ရ ၊ထိရ နမ်းရှုပ်ရမှ ဖမ်းစားနိုင်သူ၊ အအူ အသည်း အမြစ်တို့ကိုစားတဲ့ 'ရွာသမီး'လို့ သမုတ်တဲ့ မောက်ပြားစုန်းလား။ ဘယ်လို ခေါင်းစဉ်တပ်ရမလဲလို့ သူမကြံစည်တတ်။

အကြော် အလှော် အစိမ့် အအိမ့်တို့ကိုစားပြီး အမည်နာမကိုသိမှ မိမိလက်အောက်က ၃၇-မင်းနတ်တို့ကို စေပါး ခိုင်းခန့် ဖမ်းစားနိုင်တဲ့ ဇော်ဂနီလို့လည်း ခေါ်တဲ့ အိန့်တလိမ့်စုန်းလား။ လူသွေး လူသား လူရိုးတို့ကိုစားပြီး အမည်နာမကိုသိတဲ့အခါ မိမိလက်အောက်က နတ်တို့ကို စေပါးခိုင်းခန့်ဖမ်းစားနိုင်တဲ့ 'ကဝေ'ဆိုတဲ့ ကဝေမြောက်စုန်းလား။ နောက်တစ်ကြိမ်ဆုံမှ ခွဲခြားသိတော့မှာပဲ။

ကပ်ဘေးအသွယ်သွယ်နဲ့ ပျက်ဆီးခြင်းအဖုံဖုံကို ကြုံဆုံနေရလည်း တရားလက်ကိုင်မရှိနိုင်သူရယ်လေ။ မြေလွှာပြတ်ကာ အသုရာချောက်တွေ ပေါ်လာလည်း မကြောက်မရွံနဲ့ ပြုံးနေမြဲပေါ့။ နောက်နာရီပိုင်းမဆိုင်းခင်မှာပင် ကမ္ဘာပျက်ကာ အသက်ပျောက်မယ် ပြောလည်း တုန်လှုပ်မယ်မဟုတ် ။ မသေခင်လေးမှာ သစ္စာရှာကာ ရှေ့တိုးမိုက်ဖို့သာ ခြေလှမ်းပြင်တော့တာ။ တကယ်ပါ။ ရခဲလှတဲ့ လူ့ဘဝမှာ လုပ်သင့်တာမှန်သမျှ ဆောင်ရွက်ခဲ့ပြီးပြီ။ ဖြစ်ချင်တာတွေကိုလည်း မကြိုးစားသင့်ဘူးလား။ သူမမျက်နှာဖုံးကို ခွာရမယ်။ အလို ။ ဒါမှားသတဲ့လား။

အခါးဆိုတဲ့ သံသယဖြစ်ခံရမှုတွေကို မြိုချသောက်သုံးခဲ့ပြီးပြီ။ ဒီထက်ပူလောင်စရာ မကျန်တော့ပြီမို့ ဘာကိုမှုရဦးမှာလဲ။ ဂုဏ်သိက္ခာအတွက်။ ဟင့်အင်း။ မာနကြောင့်လည်း ဖြစ်တယ်။ တကယ်ပါ။ ထိုအခါမှ အသေမျက်လုံးကို ငြိမ်းငြိမ်းချမ်းချမ်း ပိတ်နိုင်တော့မှာ။ သက်သေရှာကြံစည်ခြင်းကို မြဲမြဲဆုတ်ကာ အစွဲမပြတ်နိုင်အောင်။ အကျိတ်အခဲတွေ ပြင်းဆူလွန်းလှချည့်။

ကမ္ဘာကြီးပျက်စီးတော့မှာလား။ သူ့အသံကို လက်ခံမယ့် လူတွေတစ်ယောက်မှ မရှိတော့ဘူးလား။ ကြွေလွင့်တော့မယ့်အချိန်မှာ မာန၊ဒေါသ၊အာဃတတွေ ဖယ်ခွာသင့်ပြီတဲ့လား။ ဟင့်အင်း ။ မတတ်နိုင်ပါဘူး။ ဘုရား ရဟန္တာမဟုတ်ဘူးရယ်။ လူသားတစ်ဦး အမှန်မမြင်ဘူးဆိုတောင် ဇဝေဇဝါဖြစ်သွားရင် သူကျေနပ်ပြီ။

သိကြားမကယ်တဲ့ ဘဝတဲ့လေ။ တရားမျှတမှုဆိုတာ အသက်နဲ့ရင်းလည်း မရဘူးဆိုပဲ။ ဒါပေမယ့် ရှေ့ဆက်တိုးမယ်။ ကျေးဇူးပြုပြီး မျက်ကွယ်ပြုထားပါ။ သေသွားတဲ့အခါ...။

ဘာကိုမှ မကြောက်တော့ဘူး။ ပြုစားလုပ်ကြံခံရတော့မှာသိလျှက် သူရှေ့ဆက်သွားတဲ့အခါ ထောင်ချောက်ထဲကျလေပြီ။ သူမနဲ့ မျက်နှာချင်းဆိုင်ပေါ့။ သူ့ကြိုးစားမှုအတွက် ရရှိတဲ့ ဆုလာဒ်ကတော့ အသတ်ခံရခြင်း။ ဒါဟာ ကံကြမ္မာက ချောပို့လုပ်ပြီး ပို့ပေးလိုက်တဲ့ နောက်ဆုံးလက်ဆောင်။ ဇာတ်သိမ်းမှာ သူသိရှိခဲ့ပြီ။ သူမဟာ ကိုယ်တိုင် မြင်ရ ၊ထိရ နမ်းရှုပ်ရမှ ဖမ်းစားနိုင်သူ ။ အအူ အသည်း အမြစ်တို့ကိုစားတဲ့ 'ရွာသမီး'လို့ သမုတ်တဲ့ မောက်ပြားစုန်း။

တကယ်ပါ။ သူမဟာ စာတွေထဲကလို ကြောက်စရာ ကောင်းသူမဟုတ် ချစ်စဖွယ် ရုပ်ဆင်းနဲ့ရယ်။ မယုံဘူးလား။ဒါပေမယ့် သူဘယ်လို ပြောနိုင်တော့မလဲ။သူက The Wonderful Wizard of Oz စာအုပ်ထဲက ဒေါ်ရသီဆိုတဲ့ ကောင်မလေးလို မြောက်အရပ်က သူတော်ကောင်းစုန်းမကြီး (The Good Witch of the North) ရဲ့ အနမ်းတစ်ပွင့်နဲ့ ကာကွယ်ခြင်းခံရသူ မဟုတ်ဘူး။ သူမဟာ ရေနဲ့ ပက်လိုက်ရင် အရည်ပျော် ပျောက်ကွယ်သွားမယ့် စာအုပ်ထဲက ကောက်ကျစ်တဲ့အနောက်အရပ်ကစုန်းမအို(the Wicked Witch of the West) လည်း မဟုတ်ဘူး။

သူ ဘယ်လို သက်သေပြနိုင်ဦးမှာလဲ။ သူမလက်ထဲမှာ သူ့နှလုံးသား။ အော်ဟစ်လှောင်ပြောင်သံများ။ တစ်သံချင်း ပြန်လည်ခံစားရင်း သူ အသက်ငင်နေပြီ။ “ဟေး” သူ အားကုန်အော်ဟစ်လိုက်ပေမယ့် အသံဆိုးဟာ လည်ပြွန်ဝမှာပင် တစ်ဆို့ပျောက်ရှသွားပြီ။ “သူမက စုန်းပါ။ယုံပါ။ ဒီမှာ ငါသေနေပြီ” ဘယ်လိုပင် ကြိုးစားပြောလည်း ဇောကပ်နေတဲ့ စကားတစ်စွန်းတစ်စမှ လျှံကျမလာတော့........။
...................................................................................................................................................

အမှန်တရားတဲ့လား။ ဒီလိုပါပဲ ။ အချိန်တစ်ခုရဲ့ စွမ်းအင်အောက်မှာ ဒဏ္ဍာရီအဖြစ် အသွင်ပြောင်းသွားတဲ့ အရာ။

မယ့်ကိုး


image credit : lkhero.blogspot.com

10 April 2011

ညှို့ခြင်း

အသံလေးတစ်သံ... ဘယ်လိုမှ အမှတ်တမဲ့ထားလို့ မရဘူး။ ညှင်းသဲ့သဲ့သာယာနာပျော်ဖွယ် သံစဉ်လေးရယ်။ မျက်လုံးတွေစုံမှိတ်ထားပေမယ့် ကျွန်မရဲ့လက်ချောင်းတွေက သူ့ရင်ခွင်တစ်လျှောက်မှာ ရှေ့တိုးနောက်ငင်ပျော်ရွှင်စွာ ပြေးလွှားနေတာကိုလည်း ပကတိမယွင်းမြင်နေရတယ်။ 

 ………………………… 

ကံဆိုးမသွားရာ မိုးလည်းထစ်ချုန်းရွာသလို မိုးကြိုးပစ်ခံမရခင် အချိန်ကိုက်အဆိပ်မြှားတွေလည်း လက်ခံရရှိတတ်လေတာ။ မယုံမရှိပါနဲ့။မာယာမဲ့စွာ အခန်းထောင့်မှာ မှီရပ်နေဆဲ အေးချမ်းတဲ့သူကပင် ကျွန်မကို မုန်းတယ်လို့ ဆိုလေရဲ့။ သူ့ကို ဘာလို့ ပိုင်ဆိုင်ထားတာလဲလို့ မေးနေပြီ။ “ပျော်ချင်လို့လေ။ နင်နဲ့ငါအတူပေါင်းကာ သာယာလှပမှုတွေ ဖန်တီးချင်လို့ပေါ့” လို့ ဖြေတဲ့အခါ ခွက်ထိုးခွက်လှန် လှောင်ရယ်လေတာ။ ဒါပေမယ့် စိတ်မဆိုးနိုင်ပါဘူး။ ဆို့နင့်လွန်းပေမယ့် ကျွန်မရဲ့ ချို့ယွင်းချက်တွေသာမို့ သူ့အတွက် စိတ်မကောင်းဖြစ်ရသေးတာ။ 

တကယ်ပါ။ စိတ်မရှိပါနဲ့ကွယ် ။ အလို…ဆိုးတဲ့ဘဝမှာ သက်မဲ့ကိုပင် တောင်းပန်နေရပါလားနော်။ ဒါပေမယ့် သူ့ရင်ဖွင့်သံကို ကြည်လင်သာယာအောင် မဖန်တီးနိုင်သူရဲ့ အပြစ်တွေချည်းပါရယ်။ သူ့ကြိုးမျှင်လေးတွေမှာ တို့ထိကစားတယ်။ သူအနားမှာ ရှိနေရုံနဲ့ ရင်ခွင်ထဲပူနွေးလုံခြုံလာကာ သူ့ကို ပွေ့ပိုက်ထားတဲ့အခါ နှလုံးခုန်မြန်လာ။ ပျော်တတ်ခဲ့ပြီပေါ့။ ဒါပေမယ့် သူကတော့ ကျွန်မကို မုန်းပါတယ်တဲ့။ တခါတလေတော့ ကျွန်မလည်း မာနလေးတဆုတ်စနဲ့ သည်းမခံချင်ဘူးရယ်။

 “နင်ဒီလောက်ရုပ်ဆိုးတာ ငါ့အနားမှာ နေရတာပဲ ကံကောင်းတယ်မှတ်ပါ” လို့ ခွန်းတုံ့ဆိုတာပေါ့။ ဟုတ်ကဲ့။ ကျွန်မသူ့ကို မြင်မြင်ချင်းချစ်ခဲ့တာ မဟုတ်ပါဘူး။ ရုံးက ဦးလေးကြီးရဲ့ သားရေအိတ်ထဲကနေ သူ့ကို ဆွဲထုတ်စဉ် မြင်ခိုက်ခဏမှာ စိတ်ပျက်လက်ပျက်ပင် ဖြစ်ခဲ့မိတာ။ သူရဲ့မျက်နှာစာမှာ Spruce ထင်ရူးဖြစ်ကာ ဘေးနဲ့နောက်ကျောမှာ မဟော်ဂနီရောင် တွဲဖက်ဝတ်ဆင်ထားရဲ့။ classic အမျိုးအစားသူ့ကို လှတယ်လို့ မထင်နိုင်လည်း မမြင်ခင်မှာ လိုချင်မိသူအမှားမို့ နှစ်သက်လက်ခံဖို့ ကိုယ့်ကိုကိုယ်တွန်းအားပေး ကြိုးစားခဲ့ရတာ။

 ကျွန်မက အရိုးရှင်းဆုံးတွေသာ မြင်ကွင်းမှာ လင်းတဲ့သူပေမယ့် မဲပြာပုဆိုး ဖန်တရာတေ ဖန်တီးမှုမျိုးကိုတော့ နှာခေါင်းရှုံ့တတ်သူရယ်လေ။ အမှန်စင်စစ်က အပြာရောင်ကိုယ်ထည်လေးသာ အိပ်မက်မျက်နှာကျက်မှာ လင်းဖြာခဲ့တာ။ ဒါပေမယ့် ကျွန်မရဲ့ မကောင်းဆိုးဝါးဓလေ့တစ်ခုမှာ ပိုင်ဆိုင်ရာမှန်သမျှ ကိုယ့်ငါးချဉ်ကိုယ်ချဉ်ကာ မျက်စိစုံမှိတ်ချစ်နိုင်ခြင်းရယ်။အခုလည်း တားမရထိန်းမနိုင်အောင် အလဲလဲအပြိုပြို သူ့ဆီမှာ ပျော်ဝင်ခဲ့ပြီ။ သူသာ ကျွန်မရဲ့တစ်ခုတည်းသော အားထားရာပါ။ ခွန်းချိုသာတဲ့ သူ့စကားလေးနဲ့ လေဟာနယ်ထဲ မျောလွင့်ချင်မိ။ ခဏလေးပါ။ အချိန်တဖြတ်ကလေးပဲ ထွက်ပြေးပါရစေ။ ဟိုးအဝေးကြီးကို။ သူနဲ့သာဆိုရင် တိမ်တွေကြားထဲလည်း မကြောက်မရွံ့မျောလွင့်နိုင်။ သူ့ကို သံယောဇဉ်ငြိတွယ်မိပြီလေ။ သူနဲ့ ဆော့ကစားရတာ ပျော်သလို အတည်ကြံပြီးလည်း ခံစားချက်ညှိဖို့ ကြိုးစားခဲ့သူပါ။ 

ဒါပေမယ့် သိမ်ငယ်စိတ်ကြီးသူရယ်။ သင်တန်းမှာ ကလေးတွေနဲ့ အတူသင်ရတဲ့အခါ ရှက်အနာသည်းမိတာ။ ကလေးတွေရဲ့ လက်ချောင်သေးငယ်လေးတွေက ကျွန်မထက်သာတဲ့ သံစဉ်ကို နာပျော်ဖွယ်ဖန်တီးနိုင်တဲ့အခါ...။ ကျွန်မက အလုပ်လုပ်နေတာလေ။ အိမ်အလုပ်တွေ လုပ်ရတယ်လေ။ လူမှုရေးတွေ ရှိတယ်လေ လို့ ဆင်ခြေတွေပေးပြီး ရှောင်ပြေးချင်မိတာ။ ဒါ ပါရမီကြောင့်လား။ မဟုတ်သေးပါဘူး။ ကြိုးစားမှုနည်းလို့ပါ။ ဟင့်အင်း ။ လူကိုက ညံ့တာ။ ပုပ်သိုးမျက်နှာကို အောက်ချကာ။ မုန်းတယ်။ ဒီတစ်ခါ လက်ညှိုးကို ဘယ်သူ့ဘက်မှ လှည့်မရတော့ ကိုယ့်ကိုကိုယ်ပြန်ငြှိုးကာ ကြေကွဲမပြေနိုင်။ စာအုပ်တွေ ရှိတယ်။ ရုပ်မြင်သံကြားသင်ကြားမှုတွေရှိတယ်။ ဘာလို့ မဖြစ်နိုင်ရမှာလဲ။ ဖြစ်ကို ဖြစ်ရမှာပေါ့…။

စကားလုံးတွေသာ ဦးနှောက်ထဲက လွတ်လပ်စွာပြေးလွှားနေပေမယ့် လက်တွေ့မှာ အံမဝင်သေးဘူး။ အချိန်ချို့တာ ဗန်းပြပြီး တကယ်က ကျွန်မ လက်ကြောတင်းသူ မဟုတ်ဘူး။ အားနာရမယ့် ဆရာလည်း မရှိ်လေတော့ ကစားစရာလို သူ့ကို ဆော့မိတဲ့အခါ သူက ကျွန်မကို မုန်းလိုက်တာ တဲ့။ ခွင့်လွှတ်ပါလို့ တောင်းပန်စရာလား။ ပညာရှင်မဟုတ်ပေမယ့် ကျွန်မမေတ္တာကြောင့် သူ သည်းခံသင့်ပါရဲ့နော်။ အဲဒီလို သူစိတ်ကောက်တာကြောင့် ကျွန်မက တဖန်စိတ်ပြန်နာကာ ပေါင်းသင်းဆက်ဆံဖို့ ခက်ခဲ့ပြီ။ 

သူ့ရင်ခုန်သံတင်းမာသလို ကျွန်မနှလုံးသားလည်း မပူနွေးတော့။ အခုတော့ ပြာနုနုဖြူလဲ့လဲ့အခန်းငယ်မှာ ဂဂျိုးဂဂျောင်အသံကြောင်လေးတွေ အေးစက်နေပြီ။ လာလေ… မလာတော့ဘူးလား။ ပြန်လာပါ။ အရောင်စုံသံစဉ်တွေနဲ့ ငါတို့ တိုင်းခန်းလှည့်လည်ရအောင်ပါ။ အနုပညာဘာသာစကားတစ်ခုကို ကျန်မ တတ်ကျွမ်းပါရစေဦး။ စိတ်လိုလက်ရအချိန်လေးများမှာ သူ့ကို ပြန်ချော့ပါသေးတယ်။ သို့ပေမယ့်လည်း ။ ဒါပေမယ့်လည်းကွယ်။ ကျွန်မရဲ့ အချိန်ဇယားမှာ သူ့အတွက်နေရာ ကျဲပါးခဲ့ပြီ။ 

ခွင့်လွှတ်လိုက်ပါကွယ်။ တစ်နေ့နေ့ပေါ့။ သိပ်ချစ်ပါတယ် တကယ်ပါ။ နင့်ကို ငါမမေ့သွားပါဘူး။ ငါတို့နှစ်ယောက်ကို ဘယ်သူမှ မခွဲစေရပါဘူး။ ယုံပါ။ ဘယ်လိုပဲ ဝန်ခံစကားဆိုလည်း သူ မျက်မာန်မပြေတော့ ။ ကျွန်မ သူ့ကို တင်းတင်းဖက်ထားလည်း နှစ်ဦးစလုံးကြားမှာ နွေးထွေးမှုဝင်မလာတော့။ ငါ့ကို မနှိပ်စက်ပါနဲ့။ ငါ့ရာသီခွင်မှာ တော်လည်းသံတွေအပြည့် ငရဲမီးတွေပဲ ရက်ဆက်ရွာနေတာပါ။ နင်တစ်ဦးတည်းသာ ငါ့အနားမှာ ရှိတာပါ။ စိတ်နှလုံးညှိုးလျလို့ မျက်ဝန်းတဝိုက်စိမ့်စိုလာလည်း လက်တွေက မနူးညွတ်နိုင်တဲ့အခါ သူခွင့်မလွှတ်ချင်ခဲ့။ တတ်နိုင်သလောက်တော့ ငါလည်း ကြိုးစားနေတာပဲလေ။ ဘာပဲဖြစ်ဖြစ် ငါ့ကို မထားခဲ့ပါနဲ့နော်။ နင့်သံစဉ်လေးသာ င့ါကိုးကွယ်ရာပါ။ ဘယ်လိုပင် နှိမ့်ချပြောလည်း စိတ်နာဟန်နဲ့ သူမကြားယောင်ဆောင်နေတာ။ ဘယ်ဘဝက ကံကြွေးတွေလဲကွယ်။

 ဟင့်အင်း။ ဘာပဲဖြစ်ဖြစ်။ တစ်နေ့နေ့ပေါ့။ တကယ်ပါ။ ငါ့ချစ်ခြင်းတွေနဲ့ သက်သေပြမယ်နော်။ ယုံကြည်ပါ။ ပဉ္စလက်အတတ်နဲ့ ကြိုးဆွဲကမယ့် ငါတို့နေ့တွေ ရောက်လာတော့မှာ။ ယုံကြည်ပါ။  ဟော…. ပြောရင်းဆိုရင်း ကြားရပြန်ပြီ။ အသံလေးတစ်သံ... ဘယ်လိုမှ အမှတ်တမဲ့ထားလို့ မရဘူး။ ညှင်းသဲ့သဲ့သာယာနာပျော်ဖွယ် သံစဉ်လေးရယ်။ မျက်လုံးတွေစုံမှိတ်ထားပေမယ့် ကျွန်မရဲ့လက်ချောင်းတွေက သူ့ရင်ခွင်တစ်လျှောက်မှာ ရှေ့တိုးနောက်ငင် ပျော်ရွှင်ပြေးလွှားနေတာကိုလည်း ပကတိမယွင်း မြင်နေရတယ်။ အာရုံမှာ သံစဉ်တွေဟာ မဟော်ဂနီရောင်လေးနဲ့ အတူလွင့်ပျံနေ။ ချစ်သော ဂစ်တာလေးနဲ့ ကျွန်မရယ်လေ..။ 
 ပျော်ရွှင်ကြည်နူးစွာ။ ဝမ်းနည်းကြေကွဲစွာ။ ညည်းညူတမ်းတကာ။ ကျေနပ်ပဲတင့်ကာ။

မယ်ကိုး


Image credit: www.bbc.co.uk