15 September 2018

'ဝန်ခံခြင်း'

သူမကို နှစ်ဖက်ချွန်လိင်စိတ်ရှိသူ ( Bisexual) ဟု ပြောလာလျှင် မငြင်းနိုင်ပေ။ သို့သော် လိင်ပိုင်းဆိုင်ရာထက် အသံပိုင်းဆိုင်ရာဟု ပြောမှ ပိုမှန်ကန်ပေလိမ့်မည်။ ချစ်ဖွယ်ကောင်းသော၊ ကြင်နာမှုစွက်သော ဇာတ်ဆောင်မိန်းကလေးတွေရဲ့အသံကိုနားထောင်လိုစိတ်သက်သက်ဖြင့် ဂျပန်အန်းနမေးဇာတ်လမ်းတွဲများစွာကို သူမကြည့်ခဲ့သည်။ ပဲပြုတ်ရောင်းတဲ့ ကောင်မလေးရဲ့အသံကို နားထောင်လိုစိတ်၊ သူမကို မြင်ချင်စိတ်ဖြင့် အိပ်ရေးပျက်ခံစောင့်ဖူးသည်။ ပဲပြုတ်ကို ရက်ဆက်စားခဲ့ဖူးသည်။

အသံကြောင့်ဖြစ်သော လိင်စိတ်တက်ကြွမှု (Auralism) ဖြစ်သည်ဆိုလျှင်လည်း မမှန်ပေ။ သူမသည် ထိုအသံကို ကဗျာတစ်ပုဒ်လို၊ သံစဉ်တစ်ခုလို၊ ဂီတရသလို ကြားနာခံစားလိုခြင်းသာ ဖြစ်သည်။ မည်သို့ပင်ဆိုစေကာမူ သူမသည် အသံနှင့်ပက်သက်လျှင် ဒလိမ့်ခေါက်ကွေးကြွေကျတတ်သောစိတ်ရှိသည်မှာတော့ အမှန်ဖြစ်သည်။ ပါးသိုင်းမွှေးမရှိသော ပုပုသေးသေးထိုလူဝါကလေးကို စိတ်ကစားမိခြင်းကလည်း ထိုအားနည်းချက်ကြောင့်ပင် ဖြစ်သည်။

သူသည် အလွန်တရာကိုယ်ချင်းစာစိတ်ရှိသလို၊ ကြင်နာသလို စကားဆိုတတ်သူဖြစ်သည်။ သူ့ဂရုဏာသံကြားသည်နှင့် တင်းထန်သော၊စူပုပ်သော မျက်နှာမှာ ရုတ်ချဉ်းအကြောလျော့ကာ ညွတ်နူးမြတ်နိုးခြင်းတွေ မျက်ဝန်းမှာ အရိပ်ထင်လာတတ်သည်။အင်တာနက်က အသနားခံသည့်ကြောင်ပုံလိုပဲဟု သူမကိုယ်သူမမြင်မိသည်။


ထိုသိုဖြစ်နေရသည်ကို ရှက်မိသော်လည်း သူမကိုယ်သူမထိန်းချုပ်ဖို့ ခက်ခဲနေဆဲဖြစ်သည်။ ရောဂါကို ပို၍ဆိုးစေသည်ကတော့ သူက အလွန်အမင်းအလိုက်သိတတ်သူလည်း ဖြစ်၏။ သူသည် အများတကာနှင့် စကားပြောသလို မဟုတ်ဘဲ သူမကို ပုံမန်ထက်တစ်ဝက်မျှနှိမ့်ချထားသောကြင်နာသံနှင့် ပြောတတ်သည်။ အရည်ပျော်သွားသော နှလုံးသားကပုံရိပ်များ မျက်ဝန်းမှာ အရိပ်ထင်လာမှာ ကြောက်သောကြောင့် သူမက မျက်နှာတင်းကာ၊ လေသံပြင်းပြင်းနှင့် ပြန်ဖြေလျှင် သူက ရေခဲမုန့်ဝယ်ကျွေးတတ်သည်။ ဤသို့ဖြင့် သူ့ကြောင့် သူမသည် သူစကားပြောတိုင်း မျက်တောင်မခတ်ကြည့်မိတတ်သောသနားစရာကြောင်မည်းလေး ဖြစ်ခဲ့ပြီထင်သည်။





 စာတွေထဲတွင် တခြားသူများကို ကြောင်များကို ခိုင်းနှိုင်းတတ်သောကြောင့် ဝဋ်လည်ခြင်းလည်း ဖြစ်မည်။ ထိုသို့ ကြောင်ဖြစ်သွားသောသူမသည် သူ့ကို ပွတ်သီးပွတ်သပ်ကပ်မချွဲလိုပါ။ စာဖွဲ့လို့ရရုံလေး ချစ်သည်ဟု ဆိုခဲ့သလို နက်ရှိုင်းသော ဒဏ်ရာတွေမတိုးချင်ပါ။ နာကျင်မှုတွေ မခံစားချင်ပါ။ သူ့အသံစက်ဝန်းက ထွက်ပြေးကာ လွတ်မြောက်ရာရလိုပါသည်။ အတည်။

သူ့ကြောင့် သူမ ကြောင်အစစ်ဖြစ်သွားလျှင်တော့ မမမိုးချိုသင်းက မွေးစားမလားလို့လည်း မျှော်လင့်မိလေသည်။ ။

03 September 2018

'တဒင်္ဂ'

ဟယ်ရီပေါ်တာသည် အချစ်တစ်ခုကို ဖြိုခွဲခဲ့ဖူးသည်ဟု သူမ ပြောလျှင် ယုံကြည်စေချင်သည်။ ကံအားလျှော်စွာပင် ထိုအချစ်သည် လူတစ်ယောက်ရဲ့ရင်ထဲက စိတ်ကူးယဉ်အချစ်သာ ဖြစ်သည်။ ခေတ်စကားအရ crush ဟု ပြောနိုင်သည်။

Crush ဆိုတာ ဘာလဲမေးလာလျှင် လူတစ်ယောက်ကို အရှိတရားထက် ပိုမြင်နေတဲ့ စိတ်ကူးဖြင့် အချစ်ဖန်တီးခြင်းလို့ သူမနားလည်ထားသည်။ အဝေးကကြည့်သောအခါ စိတ်ထားပြည့်၊ ဉာဏ်ရည်မြင့်၊ အရည်အချင်းကောင်းတွေချည်း မြင်ရသောအခါ crush ဖြစ်လာသည်။ ကံချို့လျှင်တော့ အနားကို တိုးကပ်မိသောအခါ ၊ ထိုပြစ်မျိုးမှည့်မထင်ပုံရိပ်က အပြစ်အနာအဆာများကို မြင်သောအခါ စိတ်ကူးယဉ်အချစ်မှာ တစ်စစီပြိုပျက်သွားတာကို ကြုံရနိုင်လေသည်။

ခံစားဖူးသူတွေတော့ နားလည်လိမ့်မည် မျှော်လင့်သည်။ ဂျပန်ဝတ္ထုတစ်ပုဒ်ထဲတွင် ခရှက်က သူ့ကိုကြည့်လို့ပြောတဲ့ စကားတစ်ခွန်းကြောင့် ဆယ်နှစ်ကြာစွဲလမ်းခဲ့သော မိန်းကလေးတစ်ယောက်ရဲ့ အချစ်ကို ဖတ်ဖူးသည်။ ထိုမိန်းကလေးလိုပင် သူမသည် 'shut up' လို့စကားတစ်ခွန်းဆိုခဲ့သော ယောက်ျားတစ်ဦးကို ကျေးဇူးတင်ချစ်ခင်ခဲ့ဖူးသည်။ သူမကို အတန်းဖော်တစ်ယောက်က အရှက်ခွဲရန် ကြိုးစားသောအခါ သူက ပါးစိတ်ပိတ်ထားလို့ ပြောတဲ့စကားတစ်ခွန်းကို မျက်ရည်ဝဲသည့်အထိ နှလုံးသားတွေတစ်စစီကြွေကြလုမတတ်ခံစားခဲ့ဖူးသည်။

စော်ကားမှုတွေဖြစ်ပေါ်လာတိုင်း သူမအနားမှာ ရပ်တည်ပေးမယ့်သူ ဘယ်သူမှ မရှိခဲ့ကြောင်း ဘုရားရှိလျှင် ဘုရားအသိပင် ဖြစ်သည်။ သူမတစ်ဘဝလုံးမှာ သူတစ်ဦးတည်းသာ သူမဘက်က ပြောခဲ့တာဟုပင် ဆိုရမည်။ သူက သူမကို ကာကွယ်ပေးတယ်ဆိုတာ သူမကို ချစ်မြတ်နိုးလို့မဟုတ်ဘဲ သူက ကြင်နာတတ်သူဖြစ်လို့ဆိုတာ နားလည်သဘောပေါက်ပေမယ့် ခံစားချက်ဆိုတာ လူ့အလိုမလိုက်တဲ့ နတ်ဆိုးဖြစ်လေသည်။

You will be crushed if you have a crush လို့ သူမ စာရေးဖူးခဲ့သည်။ အချစ်ခံလိုသော သူမသည် ချစ်တတ်သော၊ ကြင်နာတတ်သော၊ သူမကို ကာကွယ်ပေးတတ်သော သူတစ်ယောက်ကို ပြန်လည်စောင့်ရှောက်ချင်စိတ် ဖြစ်ခဲ့ဖူးသည်။ နွေးထွေးသောအလင်းတန်းလို့ သူ့ကို ညွှန်းဆိုခဲ့သော်လည်း သူက ဟယ်ရီပေါ်တာကို စိတ်မဝင်စားဖူး။ J.R Rowling စာအုပ်တွေကို တစ်ခါမှ မဖတ်ဖူးဘူးလို့ ပြောလိုက်သောအခါတွင် သူမရဲ့လှပသော စိတ်ကူးယဉ်တိမ်တိုက်မှာ ရုတ်ချည်းမည်းမှောင်ပြိုကွဲကာ မိုးအဖြစ်ရွာကျလေသည်။ သူမသည် ဝမ်းနည်းခြင်းမိုးရေစိုစိုရွဲလျက်သူ့ကို နားမလည်နိုင်စွာကြည့်ဖြစ်သည်။ ဘာဆက်ပြောရမှန်း မသိဖြစ်သွားသည်။

သူမတို့နှစ်ဦးသည် မျက်နှာချင်းဆိုင်လျှက် အဝေးကြီးကို ရွေ့သွားသည်ဟု ခံစားရသည်။ သူနှင့်သူမအကြား အကြိုက်တရားများ၊ သဘောထားများ၊ နိုင်ငံရေးအမြင်များ၊ အနုပညာရေးရာများကို ဆက်လက်ဆွေးနွေးချင်စိတ်မဲ့သွားသည်မှာ အံ့သြစရာကောင်းလှသည်။

သူမသည် အဆိုးကို မျှော်လင့်တတ်လွန်းသည်။ အကြိုက်ချင်းမတူမှာ ကြောက်နေသောကြောင့် ဘာစကားမှ ဆက်မပြောရဲအောင် ဖြစ်ခဲ့သည်။ ထိုသို့ဖြင့် သူမတို့ဝေးသွားကြသည်လို့ ဆိုပါက တစ်ခြားသူများအတွက် ရယ်စရာဖြစ်သော်လည်း သူမအတွက်မူ ကြေကွဲစရာအတိပြီးသော ဖြစ်ရပ်မှန်ဖြစ်သည်။

ဤသို့စိတ်ကူးယဉ်အချစ်သေဆုံးခဲ့ဖူးသော သူမသည် နောက်တစ်ဖန်စိတ်ကူးယဉ်ချစ်ရမည်ကိုပင် ကြောက်နေလေသည်။ အလိုက်သိ ကြင်နာတတ်သော တစ်ယောက်သောသူက Kazuo Ishigura၊ Haruki Murakami၊ Tadao Ando ၊ Hayao Miyazaki တို့ကို မသိဘူး။ သူတို့ဖန်တီးသော ဗိသုကာ၊ အနုပညာလက်ရာများကို စိတ်မဝင်စားဘူးလို့ ပြောလာလျှင် ဘယ်လိုလုပ်ရမည်နည်း။ တွေးမိရုံမျှဖြင့် အသက်ပင်ဝဝမရှုရဲဘဲ မွန်းကျပ်လာသည်။ စိတ်ဝင်စားကြောင်းပြလာသောသူ့ကို ကျေးဇူးတင်ကြောင်းပဲ ပြောကာ ပြုံးနေချင်သည်။ စိတ်ညွတ်နူးလာလျှင် စာရေးမည်။

Muse။ သူသည် သူမအတွက် အနုပညာဉာဏ်ကွန့်မြူးစေတဲ့ သက်ရှိအထိမ်းအမှတ်လေးတစ်ခုသာ ဖြစ်နေမည်။ လှပမှုကိုသာ မြင်လိုသောသူမအတွက် အချစ်တည်ဆောက်ရာတွင်ပင် ဝေဝါးသောမှန်နံရံများကို အသုံးပြုထားဆဲ ဖြစ်သည်။ ထိုသို့ဖြင့် ခြောက်သွေ့နေသောအသည်းနှလုံးသည် ငြိမ်းချမ်းပါသည်ဟု ဖြေတွေးဦးမည်။ သူမပျော်နေပါသည်ဟု လှည့်ဖျားကာ နေဦးမည်။ တစ်ချို့ပန်းပွင့်များသည် အလှကြည့်ခံစားဖို့အတွက်သာ ဖူးပွင့်လာကြသည်ဟု ထပ်မံဆိုဦးမည်။    ။



 မယ့်ကိုး

16 August 2018

အတွင်းစွဲ

'ငါက အတွင်းစွဲ (introvert)' လို့ ကျွန်မ ပြောမိတော့ ' အတွင်းစွဲဆိုတာထက် ကိုယ့်ကိုယ်ကိုယ် ကာကွယ်တာ မဖြစ်နိုင်ဘူးလား' လို့ တစ်ယောက်က ပြန်ပြောတယ်။ အဲဒီစကားကို စဉ်းစားလို့ မဝနိုင်ဘူး။ ကလေးဘဝတုန်းကတော့ သွက်လက်ချက်ချာတဲ့ကလေးမလေးလို့ လူတွေက ပြောကြတာပဲ။ ဒါပေမယ့် သိတတ်စအရွယ်မှာတင် ပြောင်းလဲသွားခဲ့တယ်။ ရိုက်နှက်ခံခဲ့ရမှုတွေ၊ ဖိနှိပ်မှုတွေ၊ ဒဏ်ခတ်ခံရမှုတွေ။

 ဒီလိုနဲ့ ကိုယ်ကိုယ်တိုင်သတိမထားမိတဲ့အကြောက်တရားကို ရင်ထဲထည့်ကာ လူတွေနဲ့အဝေးဆုံးကို ရွေ့သွားခဲ့တာ။ အနာတရဘေးကို ရှောင်ရှားကာ မည်သူတစ်ဦးတစ်ယောက်နဲ့မှ အကျွမ်းတဝင်နေဖို့ မကြိုးစားတော့တာ။ မှန်နံရံတွေကာရင်း အားလုံးနဲ့စည်းခြားကာ။ အထီးကျန်ခြင်းမှာ ပျော်မွေ့အောင် ကြိုးစားနေတတ်လာ။ ကိုယ့်ကိုယ်ကိုယ် အတွင်းစွဲလို့ ကြေငြာကာ။ အခုလိုကိုယ့်အကြောင်းကိုယ်သိပေမယ့် ပြင်နိုင်သေးရဲ့လား။ မသေချာဘူး။

နယ်အလုပ်ကြောင့် အိမ်ပြောင်းဖြစ်ရင်ဆိုရင် အိပ်ခန်းလေးတွေ ရှာဖြစ်တော့ ပိုင်ရှင်အခန်းဖော်နေရာမှာ 'I am a gay male' ဆိုတဲ့ စာကြောင်းလေးတွေ့တယ်။ အခန်းဖော်ဟောင်းကို သတိရမိပြန်ရော။ သူနဲ့နေခိုက်ဟာ အအေးချမ်းဆုံးအချိန်တွေပါ။ ဒါပေမယ့် ကျွန်မတို့မရင်းနှီးကြပါဘဲ။ မီးလျှံလို စည်းခြားထားခဲ့တယ်လေ။ ရင်းနှီးကျွမ်းဝင်လို့ မဖြစ်ဘူး။ တစ်နေ့ ဝေးကွာသွားရမှာ။ ငါပဲ နာကျင်ရမှာ။ ဆိုတဲ့ စိတ်အမြဲရှိနေခဲ့တယ်။

သူပေါင်မုန့်ဖုတ်ကျွေးတာ စားခဲ့ပေမယ့် ကျွန်မက ဟင်းတစ်ခွက် ချက်မကျွေးနိုင်ခဲ့ဘူး။ သူအိမ်ပြန်လာရင် ပြုံးပြီး မကြိုခဲ့ဘူး။ သူနဲ့ဂိမ်းအတူ မဆော့ခဲ့ဘူး။ ရုပ်ရှင်အတူမကြည့်ခဲ့ဘူး။ ဓာတ်ပြားတွေဖွင့် နားမထောင်ခဲ့ဘူး။ သူ့ကို မွေးနေ့လက်ဆောင်မပေးခဲ့ဘူး။

ဘာဖြစ်လို့များ ကျွန်မ ဒီလောက်တောင် ပေါင်းသင်းဆက်ဆံရေးညံ့ဖျင်းခဲ့ရပါလိမ့်။ ပြန်တွေးတိုင်း ကိုယ့်ကိုယ်ကိုယ်ကျိန်ဆဲ။ ငါ့ကို ဘယ်သူမှ မချစ်။ ငါလည်း ဘယ်သူမှ မချစ်ဘူး ဆိုတဲ့ သဘောတရားတွေနဲ့ စိတ်ထားကောင်းကြင်နာတတ်တဲ့သူ့နဲ့တောင် သူငယ်ချင်းအဖြစ်မရောက်ခဲ့ပါဘဲ။ အပြစ်တွေ။ အားနည်းချက်တွေ။ အနက်ရောင်ခြယ်ထားတဲ့ အတိတ်တွေ။ ဒဏ်ရာတွေရဲ့အကျိုးဆက်တွေနဲ့လူရယ်လေ... ။ သူ့ကို ဆုံးရှုံးရခြင်းမှာ ယနေ့ထက်တိုင် ဖြေမဆည်နိုင်ပါဘဲ။

ဒီတစ်ခါ အခန်းဖော်နဲ့နေရရင်တော့ စိတ်အသစ်၊လူအသစ်နဲ့ ရင်းနှီးချစ်ခင်သူတွေ ဖြစ်ခွင့်ရလိမ့်မလား။ မြက်ခင်းစိမ်းစိမ်းဝန်းရံထားတဲ့ အစိမ်းရောင်အိမ်လေးဟာ နေချင်စဖွယ်။ ကြောင်လေးနှစ်ကောင်၊ငှက်တစ်ကောင်ရှိတယ်တဲ့။ ပျော်ရွှင်ဖွယ်။ စက်ဘီးလေးစီးကာ အလုပ်သွားမယ်။ ကြည်နူးဖွယ်။ ဟုတ်ကဲ့။ ရောင့်ရဲလွယ်အောင်လည်း ကျွန်မ သင်ယူနေပါတယ်။

 image source:https://www.homedit.com/beautiful-green-houses-shades/


အခန်းဖော်ဟောင်းကို ပေးခဲ့တဲ့ ' survival tree' ဆိုတဲ့ သံလိုက်ပြားလေး သူ့ရေခဲသေတ္တာပေါ်မှာ ကပ်ထားသေးရဲ့လား။ မသေချာဘူး။ ကျွန်မတို့ကြားမှာ လှပတဲ့အမှတ်တရတွေ မရှိခဲ့ပါဘဲ။ ဝမ်းနည်းတယ်။ အတိတ်ကို ပြန်ပြင်လို့ မရတော့တာလောက် ကြေကွဲစရာကောင်းတာ မရှိတော့ပါဘဲ။ ရင်ဖွင့်အော်ချင်ပြန်တယ်။

 ဒါပေမယ့် လူဆိုတာက အတွေ့အကြုံတွေကို မှတ်သားလက်ခံရင်း အသိတရားကို စုဆောင်းရသူမဟုတ်လား။ အသိကိုအခြေခံလို့ ကိုယ့်ကိုယ်ကိုယ်ပြုပြင်ပြောင်းလဲရတာ။ ဒီလိုနဲ့ ရင့်ကျက်လာကြတာ မဟုတ်လား။ ကျွန်မ ကြိုးစားနေပါတယ်။ သူ့လို လူကောင်းတစ်ယောက်နဲ့ နေထိုင်ခွင့်ရှိလာရင် ကျွန်မဟာ အကောင်းမွန်ဆုံး အခန်းဖော်ဆိုတာ သက်သေပြချင်သေးတယ်။ အခွင့်ရှိသေးရင်လေ။

ဒါပေမယ့် ကံကောင်းမှုဆိုတာ ကျွန်မအတွက် မျှော်လင့်ကောင်းတဲ့အရာမှ မဟုတ်ပါဘဲ။
ကြေကွဲရပြန်တယ်။ ။

မယ့်ကိုး

26 July 2018

တောင်းပန်တယ်

'Demi Lovato’။ ဒမ်မီ လဗ်ဗတို။ သူ့ကို ဟိုးငယ်ငယ် ဒစ်စနေကားတွေမှာ ကြည့်ဖူးပေမယ့် သူ့သီချင်းတွေကို နားထောင်ဖြစ်ပေမယ့် သူ့ပရိသတ်မဟုတ်ခဲ့ဘူး။ ချစ်ခင်မိတာကတော့ The X Factor မှာ သူ ဒိုင်လုပ်တော့ ဆိုင်မွန်က ပမာမခန့်မလေးမစားလုပ်တာတွေကို သူက ချက်ချင်းတုန့်ပြန်ချေမှုန်းနိုင်တာကြည့်ရင်းက အစပြုခဲ့တာပါ။ နောက် သူ့လိုပဲ ငယ်ငယ်က အနိုင်ကျင့်ခံခဲ့ရတဲ့ ကောင်မလေးက သီချင်းဆိုရင်း သူ့ကို ကျေးဇူးတင်ကြောင်းပြောတော့ သူက အဲဒီကောင်မလေးဆီသွားပြီး အတူငိုကြတာမှာ ကျွန်မပါမျက်ရည်ကျမိတာ။ အဲဒီလို ပုဂ ္ဂိုလ်ခင်မိ၊ သံယောဇဉ်အစပျိုးမိပြီဆိုတော့ သူ့သီချင်းတွေကို ပိုနားထောင်မိ၊ကြိုက်မိသွားတာ။

‘Sober’။သီချင်းသံကြားစမှာတင် ပြောချင်လှပေမယ့် သူ ဆေးရုံတက်မှာပဲ ဒီစာရေးဖြစ်တော့တာ။ သူ့သီချင်းတွေမှာ ရင်ထဲအရောက်ဆုံးတေး။ မူးယစ်စေတဲ့အရာတွေကို မသုံးဘဲနေခြင်းတဲ့။တကယ်တော့ ဒီသီချင်းဟာ အရက်သေစာမူးယစ်ဆေးဖြတ်တဲ့အကြောင်းမဟုတ်ဘဲ မှောင်မိုက်စိတ်နွံတစ်ခုက လွတ်ဖို့ကြိုးစားရင်းမှာတင် ပြန်လည်နစ်မြုပ်သွားရတဲ့အခြေအနေတစ်ရပ်ကိုလည်း ရည်ညွှန်းနိုင်ပါတယ်။

"Sometimes I just wanna cave
And I don't wanna fight
I try and I try and I try and I try and I try
Just hold me, I'm lonely"

တကယ်ပဲ အဲဒီသီချင်းဟာ ကျွန်မကို ကိုယ်စားပြုတယ်။ လူလူသူသူဖြစ်ဖို့ ကြိုးစားတယ်။ အားထုတ်တယ်။ လုံ့လစိုက်နေတယ်။ ဒါပေမယ့် တစ်ခါတစ်လေတော့ လက်လျော့အရှုံးပေးလိုတယ်။ ဆက်လက်မကြိုးစားချင်တော့ဘူး။ အထီးကျန်သူမို့ ငါ့ကိုလက်တွဲထားပါလို့ ပြောချင်တယ်။ ဒါပေမယ့် ဘယ်သူ့ကို ပြောရမှာလဲ။ ကိုယ့်အဖြစ်ကို နားလည်တဲ့သူ မရှိနိုင်ပါဘဲ။ခြေချော်တဲ့အခါ ဖေးကူသူမဲ့နေဆဲ။

 "call me when it's over
'Cause I'm dying inside
Wake me when the shakes are gone
And the cold sweats disappear
Call me when it's over
And myself has reappeared"

သီချင်းထဲကလို တုန်လှုပ်နေမှုတွေ ပျယ်လွယ့်သွားတဲ့အခါ ဇောချွေး ပြန်ခြင်းတာတွေ ပျောက်ကွယ်သွားတဲ့အခါ၊ အားလုံးပြီးဆုံးသွားတဲ့အခါ ပြီးတော့ ငါတစ်ဖန်ပြန်ပေါ်လာတဲ့အခါ ငါ့ကိုခေါ်ပါ။ ငါ့ရင်ထဲမှာ သေနေလို့ပါလို့ ပြောချင်တယ်။ ဟုတ်တယ်။ ကျွန်မ ပြန်လာတဲ့အခါ နှုတ်ဆက်စေချင်တယ်။ ကြိုဆိုစေချင်တယ်။ ရင်ဘတ်ဟောင်းလောင်းနဲ့အသေလိုလူပေမယ့် ဖက်လှဲတကင်းလုပ်တဲ့အခါ ဝမ်းသာတယ်။ နွေးထွေးလုံခြုံမှုတွေနဲ့ လူဖြစ်ရကျိုးနပ်တယ်လို့ ခံစားချင်တယ်။ ခေါ်မယ့်သူရှိရဲ့လားဆိုတာ မသေချာပေမယ့် ကျွန်မအမည်များ ကြားရမလားလို့ နားစွင့်နေတယ်။ တောင့်တမိတယ်။ အိပ်မက်တွေကို မြင်ယောင်မိပြန်တယ်။

"I got no excuses
For all of these goodbyes"

 နှုတ်ဆက်ခဲ့တာတွေအတွက် ဘယ်လိုဆင်ခြေမှ ငါ့မှာ မရှိဘူးတဲ့။ ပေါ်လိုက်ပျောက်လိုက်၊ ချစ်တယ်ဆိုပြီး အဝေးမှာရောက်နေတဲ့ ကျွန်မမှာလည်း ဆင်ခြေတွေမရှိဘူး။ ဆင်ခြေပေးစရာလူလည်း မရှိဘူး။ အကြောင်းပြချက်တွေကို တကူးတကနားထောင်ပေးမယ့်သူရယ်လို့ကို ရှိတယ်မထင်ဘူး။ ဒီလိုနဲ့ကျောခိုင်းခဲ့တာတွေ၊ ဝေးကွာသွားတာတွေ၊ ပျောက်ကွယ်သွားတဲ့ အရိပ်တွေ၊ တိမ်မှုန်မျင်လို အမှတ်တရဒဏ်ရာတွေပဲ ရရှိသူရယ်လေ။

"And I'm sorry for the fans I lost
 Who watched me fall again
I wanna be a role model
But I'm only human"

ဒီသီချင်းလိုပဲ ကျွန်မပျောက်သွားတဲ့အခါ ၊ခြေရာဖျောက်သွားတဲ့အခါ မေ့ပစ်လိုက်ကြတဲ့ စာဖတ်သူတွေကို စိတ်မကောင်းပါဘူးလို့ ဆိုချင်တယ်။ 'be strong' လို့ ခဏမကြာလာပြောသူတွေကိုလည်း အားနာလှပါတယ်။ တစ်ခါချော်လဲခဲ့ဖူးပေမယ့် နောက်ဆုံးမှာ ဝံ့ဝံ့ကြွားကြွားရပ်တည်နိုင်သူ ဖြစ်ချင်တယ်။ သူကလေ ဆိုပြီး ဥပမာပေးခံရသူ ဖြစ်ချင်ပါတယ်။ ဒါပေမယ့် ကျွန်မက လူပါပဲ။ အားနည်းချက်တွေနဲ့ ပုထုဇဉ်ရယ်။ လူတကာကြည်ညိုစရာ စံပြမဖြစ်နိုင်သေးပါဘဲ။




 ထပ်မံပြိုလဲရပြန်တဲ့အတွက် တောင်းပန်တယ်လို့ ဆိုချင်တယ်။ အကူအညီယူပါမယ့်လို့လည်း ကတိပေးချင်တယ်။ဒါပေမယ့် မာနတွေဟာ လူကိုသတ်နေတယ်။ ဘဝကို တစ်စစီဆုတ်ဖြဲပစ်ဖို့ မရည်ရွယ်ခဲ့ပါဘူးလို့ ဆိုချင်တယ်။ ကိုယ့်ကိုယ်ကိုယ် မေတ္တာထားဖို့၊ သည်းခံဖို့၊ ခွင့်လွှတ်ဖို့ ဖြောင်းဖျချင်တယ်။ ကြောင့်ကြစိုက်ချင်တယ်။ အသိတရားရချင်တယ်။ ဒါပေမယ့်၊ ဒါပေမယ့်...ဒါပေမယ့်လေ ဒီဘဝကို ချည်နှောင်ထားတဲ့ကြိုးတွေ ကျွန်မမှာ မရှိပါဘူး။ တံလျှပ်အိပ်မက်တွေအတွက် သုံးစွဲထားတဲ့ခွန်အားတွေလည်း ကုန်ခမ်းနေပါပြီ။ မချစ်သူတွေကို ဟန်ဆောင်ပြုံးရတာလည်း ပန်ပန်းလှပါပြီ။ သိပ်သည်းမွန်းကျပ်တဲ့အမှောင်ထုမှာ အားတင်းလျှောက်ရင်းမှာတင် နွမ်းလျလှပါပြီ။ အတောင်မဲ့ ငှက်လို မတည်ရှိချင်တော့ပါဘူး။ တိတ်တဆိတ်ထွက်သွားချင်လှပါပြီ။

ကျွန်မ မရှိတော့လို့ စိတ်မချမ်းမြေ့မှု တစ်ခုခုခံစားရမယ်ဆိုရင် တောင်းပန်ပါတယ်လို့ပြောချင်တယ်။ အစွမ်းရှိသလောက် ကျွန်မကြိုးစားခဲ့ပါတယ်။ ဒေါသမထွက်ပါနဲ့။ အားနည်းသူပါ။ တစ်ချို့လူတွေဟာ ကြိုးစားနေရင်းမှာတင် ထောင်ချောက်ထဲက လွတ်အောင်မရုန်းနိုင်ဘဲ ပြန်ကျတတ်ပါတယ်။ စိတ်မရှိပါနဲ့။ အရေးတယူထားစရာမလိုတဲ့သူကို မေ့ပစ်လိုက်ပါ။ စိတ်မကောင်းမဖြစ်ပါနဲ့။ ကျွန်မ ပျော်ခဲ့ပါတယ်။ ခွင့်လွှတ်လိုက်ပါ။ မိုက်မဲသူကိုရော မကယ်တင်နိုင်ခဲ့တဲ့အတွက်ရော ကိုယ့်ကိုယ်ကိုယ်အပြစ်မတင်ပါနဲ့။ ဒမ်မီရဲ့ သီချင်းကို ကြားမိရင် တောင်းပန်ပါတယ်လို့ကျွန်မပြောခဲ့ဖူးတာကိုသတိရပေးစေချင်ပါတယ်။ ။

မယ့်ကိုး

15 July 2018

သားကောင်းမှလင်ကောင်းဖြစ်

သားကောင်းလင်ကောင်းမဖြစ် စကားပုံကြောင့် ငယ်ငယ်တုန်းက သားကောင်းကိုရရင် ယောက္ခမက နှိပ်စက်တာခံရတော့မှာပဲ တွေးခဲ့တယ်။  အမေကိုးကွယ်တဲ့သားတွေကြောင့် အိမ်ထောင်ရေးပြိုကွဲသွားတဲ့ စာတွေ၊ လက်တွေ့ဘဝတွေမြင်ရတော့လည်း ဒီအဆိုဟာ မှန်သလားလို့တောင် ယုံထင်ကြောင်ထင်ဖြစ်မိတယ်။ ဒါပေမယ့် ယဉ်ကျေးချိုသာပြီး ရိုးသားဖြူစင်ကာ တစ်ဖက်သားကိုစာနာထောက်ထားတတ်တဲ့ ယောက်ျားများနဲ့တွေ့ရင် သူ့အမေများ ဘယ်လိုသင်ခဲ့ပါလိမ့်ဆိုပြီး ကျွန်မစဉ်းစားမိတတ်ပါတယ်။ 

အဲဒီလိုအကျင့်ကောင်း၊ စိတ်ကောင်းရှိတဲ့သူရဲ့ အမေဟာ အနိုင်ကျင့်တတ်တဲ့သူဖြစ်မှာမဟုတ်ဘူး။ စိတ်ထားမြင့်မြတ်ရင့်ကျက်သူပဲ ဖြစ်မှာလို့ ယုံကြည်မိတတ်တယ်။ အဲဒီလို သူတို့အမေကိုချီးကျူးမိစေတဲ့ လက်ငါးချောင်းတောင် မပြည့်တဲ့လူစာရင်းမှာ ခရစ်အက်ဗင်စ်ပါဝင်ပါတယ်။ ခရစ်အက်ဗင်စ်ကို လင်ယောက်ျားကောင်းတစ်ယောက်ရဲ့ ရှိသင့်တဲ့စံတွေ တိုင်းတာလို့မရသေးသည့်တိုင်အောင် သားအမိတွေကြားက ရှိသင့်တဲ့ဆက်ဆံရေးကို နားလည်စေတယ်။

အနိုင်ကျင့်ဗိုလ်ကျသူတွေကို တိုက်ဖျက်တတ်တဲ့ ကပ္ပတိန်အမေရိက စိတ်ဓာတ်ကို ငယ်ငယ်လေးတည်းက သူ့အမေအားပေးပျိုးထောင်ခဲ့တာ ဖြစ်ပါတယ်။သူ သုံးလေးတန်းလောက်တုန်းက ကလေးတစ်ယောက်ကို တခြားသူတွေက အနိုင်ကျင့်နေတာ သူမြင်ခဲ့တယ်။ သူတစ်နေ့ လုံးစိတ်မကောင်းဖြစ်နေခဲ့တယ်။ ညအိပ်ရာဝင်တဲ့အခါ စောင်လာခြုံပေးတဲ့ သူ့အမေကို သူစိတ်မကောာင်းဖြစ်ရတဲ့အကြောင်းပြောတော့ သူ့အမေက (သူကာကွယ်မပေးနိုင်ခဲ့လည်း) စိတ်နှလုံးသားကတော့ အရေးကြီးဆုံးပါ။ အဲဒီစိတ်နှလုံးသားကို အမြဲမြန်ကန်နေအောင်ထားဖို့ ပြောခဲ့တယ်။

 ဒီလိုစိတ်ထားမျိုးကအစ လိင်ကိစ္စတွေအထိ သူနဲ့သူ့အမေဟာ ပွင့်လင်းရင်းနှီးစွာ ဆွေးနွေးနိုင်ကြသူတွေလည်းဖြစ်တယ်။ သူပထမဆုံးလူပျိုရည်ပျက်သွားတဲ့ အိမ်ကို ပြန်ပြေးပြီး သူ့အမေ့ကို ' သားလုပ်ခဲ့ပြီ။ ဘယ်လိုလုပ်နေလဲတော့ သားမသိဘူး။ ဒါပေမယ့် သားလုပ်ခဲ့ပြီလို့ထင်တယ်' လို့ပြောခဲ့တယ်။ ဒီလိုလိင်ကိစ္စတွေပြောရတာတောင် သူတို့သားအမိဟာ အနေမခက်ခဲ့ကြဘူး။ သူ့အမေက သူ့အကြောင်းတွေကို မျှဝေခဲ့တဲ့အတွက် ဝမ်းသာတယ်လို့ဆိုတယ်။ မိဘတစ်ယောက်အနေနဲ့ရိုးသားမှုကို လိုလားတယ်လို့ ကျွန်တော်ထင်တယ်လို့ သူကဆိုတယ်။




လိင်ကိစ္စတွေကို ရှက်ကြောက်စရာလို့မထင်ဘဲ သဘာဝအဖြစ်လက်ခံထားသူဟာ မိန်းမတစ်ယောက်ကို လိင်ဖျော်ဖြေမှုတစ်ခုလို့သာ မထင်ဘဲ လက်တွဲဖော်လူသားအဖြစ်၊ ချစ်ခြင်းမေတ္တာမျှဝေနိုင်သူအဖြစ် မြင်တတ်တာ မဆန်းပါဘူး။ ပြီးတော့ ခရစ်ဟာ မိန်းမတစ်ယောက်အလှဆိုတာ အရည်ပြားထက်ကျော်ပြီး မြင်တတ်သူလည်း ဖြစ်တယ်။ ရုပ်ဆိုးတယ်ဆိုပြီး သူ့ပရိသတ်တွေက မခံချိမခံသာသဘောမတူကြတဲ့ သူ့ရည်းစားဟောင်း Jenny Slate ကိုဆို ' သူမဟာ သူမရဲ့အားနည်းချက်ကိုပွင့်လင်းမြင်သာစေတယ်။ တအားရိုးသားတယ်။ သူမကိုယ်သူမထက် တခြားသူတွေပေါ်မှာ စိတ်ဝင်စားတယ်။ တကယ့်ကိုကြင်နာစိတ်ရှိတယ်။ သူမနဲ့ပက်သက်ပြီး မချစ်စရာဘာအကြောင်းမှ မရှိဘူး' လို့ ပြောတတ်တယ်။

သူဟာ ဒီလို သူ့ရည်းစားဟောင်းများကောင်းကြောင်းသာ ဆိုသူဖြစ်ပါတယ်။ သူနဲ့ဂျင်းနီစလိတ်တို့ဝေးသွားတဲ့တိုင်အောင် သူမဟာ အံ့သြသင့်ဖွယ် အရည်အချင်းရှိသူဖြစ်ကြောင်း အမြဲပြောတတ်တယ်။ 'ကျွန်တေ်ာ့ဘဝမှာ ဆိုးဆိုးရွားရွားလမ်းခွဲလိုက်ရတာမျိုး မရှိဘူး' လို့ သူက ဆိုတယ်။ 'ပုံမှန်အားဖြင့် ရည်းစားဟောင်းတွေနဲ့တွေ့ထားနဲ့ရင်းရင်းနှီးနှီးပွေ့ဖက်လိုက်တာပဲ။ ပြီးတော့လက်ရှိအခြေအနေတွေပြောပြရတာ ကြည့်နူးအံ့သြစရာပဲ။ တစ်ယောက်ကို ချစ်ရလောက်အောင် နဲ အဲဒီတစ်ယောက်က ပြန်ခွင့်ရတာက တော်တော်ကံကောင်းနေပြီ။ တခြားတစ်ယောက်က ကိုယ့်အကြောင်းကိုအမှန်တကယ်သိတယ်ဆိုတာ သိပ်ရှားတယ်။ ဒါကို တန်ဖိုးထားကာကွယ်သင့်တယ်။' လို့ပြောတတ်တယ်။

သူရဲ့အချစ်ဆုံးသူငယ်ချင်းက မိန်းကလေးဖြစ်ပြီး မိန်းမတွေကို လေးစားတတ်တဲ့သူ့အကြောင်းကို ပြောတိုင်း သူ့အမေအကြောင်းဟာ အဓိကနေရာက ပါဝင်ပါတယ်။ ' ကျွန်တော့အမေက သူ့ခေတ်သူ့အခါထဲက ယောက်ျား၊မိန်းမ သာတူညီမျှအခွင့်အရေးအကြောင်းကို စိတ်ထဲမှာ တဖြည်းဖြည်းစိမ့်ဝင်နေအောင် သင်ပေးခဲ့တယ်' လို့ဆိုတယ်။ ဒါကြောင့်သူဟာ မိန်းမဝါဒီလို့ပြောရမှာ မရှက်သလို အားနွဲ့သူအပေါ် ကြင်နာယဉ်ကျေးစွာ ဆက်ဆံတတ်သူလည်း ဖြစ်တယ်။ ' အကောင်းဆုံးအဖြစ် မိန်းမတစ်ယောက်ကို ပေးနိုင်တဲ့အရာကတော့ အလေးထားဂရုစိုက်မှုပဲ လို့အမေကပြောတယ်။ မိန်းမတွေက ကိုယ့်ကို အထင်ကြီးအောင် မကြိုးစားနဲ့။ သူ ပြောတာနားထောင်ဖို့သာ ကြိုးစားတဲ့။'

ဒီလိုသွန်သင်ခံရတဲ့ယောက်ျားတစ်ယောက်ဟာ လင်ယောက်ျားဆိုးဖြစ်လာမယ်လို့ ကျွန်မ မထင်ပါဘူး။ တကယ်တော့ သားကောင်းမှ လင်ကောင်းဖြစ်နိုင်မယ်လို့ ယုံကြည်မိတယ်။ အမေကို မချစ်တတ်တဲ့သားကသာ စိတ်ဒဏ်ရာတွေဗလာပွနဲ့ မိန်းမတွေကို ထိခိုက်နစ်နာစေမှာပဲလို့ သံသယဖြစ်မိတယ်။ အနည်းဆုံးတော့ မိန်းတွေကို လေးစားတတ်အောင်၊ မိန်းမတွေကို တန်းတူညီမျှလူလို့ နားလည်လက်ခံအောင် သွန်သင်ပေးတဲ့အမေတွေ ဒီထက်များလာမယ်ဆိုရင် လူတကာကို အမျိုးသမီးအခွင့်အရေးအကြောင်းကို အာပေါက်အောင် မပြောရတော့ဘူးလို့ မျှော်လင့်မိပါတယ်။ ။

 မယ့်ကိုး

11 July 2018

'ရှူး'

လူတောမတိုးဘူးလို့ အမေက ကျွန်မကို ပြောလေ့ရှိပါတယ်။ အမှန်ပါပဲ။ ကျွန်မမှာ လူတွေနဲ့ဆက်ဆံရမှာကြောက်တဲ့စိတ်ဝေဒနာ (social anxiety) ရှိတယ်လေ။ လူတွေက ကျွန်မကို အာရုံစိုက်နေတယ်ဆိုတာ သိလိုက်တာနဲ့ စိတ်ရောလူပါ သက်သောင့်သက်သာ မရှိတော့ဘူး။ တစ်ကိုယ်လုံးပူနွေးလာတယ်။ အသံတုန်ကာ စကားပြောရခက်လာတယ်။ နှလုံးခုန်ပြန်ပြီး ခြေလက်မခိုင်ချင်သလိုဖြစ်တယ်။ လူတွေက ဒီလိုဖြစ်ပျက်တုန်လှုပ်နေမှုကို ကဲ့ရဲ့မှာစိုးတယ်။ အကဲဖြတ်ခံရတာ ကြောက်တယ်။ အဲဒီလို ရုပ်ပျက်လေ ပိုအရှက်ရလေဖြစ်နေခဲ့တယ်။

 ဒီစိတ်ဝေဒနာကို ခံစားရခြင်းတွေဟာ အကြမ်းမျဉ်းအားဖြင့် အနိုင်ကျင့်ခံခဲ့ရလို့၊ မိသားစုတွင်းမှာ ပဋိပက္ခဖြစ်ခဲ့လို့၊ လိင်မှုဆိုင်ရာအကြမ်းဖက်ခံခဲ့ရတာတွေကြောင့်လို့ ဆိုတယ်။ အဲဒါကြောင့် ကလေးဘဝကစပြီး ယနေ့ထက်ထိ အရာရာပြည့်စုံတယ်ထင်ရတဲ့ ခရစ် အက်ဗင်စ်မှာလည်း  ဒီလိုမျိုးစိတ်ဝေဒနာ ရှိတယ်လို့သိလိုက်ရတဲ့အခါ အံ့သြသွားမိတယ်။ ဒါပေမယ့် တစ်ချို့တွေကလည်း မိဘမှာ ဒီလိုစိတ်အခြေအနေမျိုးဖြစ်တတ်ရင် ကလေးက မိဘဆီက သင်ယူပြီး ဖြစ်တတ်တယ်လို့ဆိုသလို အရမ်းထိန်းချုပ်ခံရပြီး၊ အလွန်အကျွ ံကာကွယ်ပေးခံရပြီး ကြီးပြင်းလာရင်လည်း ဒီစိတ်ဝေဒနာဖြစ်လာတတ်တယ်လို့ ဆိုကြတယ်။

လူတစ်ယောက်ရဲ့ဘဝကို အပြည့်အစုံနားလည်ဖို့ ခက်ပါလားဆိုတာ ဝန်ခံလိုက်ရတယ်။ ဒီလိုဒဏ်ရာတွေကို သူဘယ်လိုရရှိခဲ့တာကို သိဖို့ထက် သူလည်းကိုယ့်လို ဒီစိတ်ဝေဒနာခံစားရပါလားဆိုကာသာ စိတ်မကောင်းဖြစ်မိတယ်။ ဒါဟာ ကြင်နာမိခြင်းရဲ့ လမ်းစဖြစ်ပါလိမ့်မယ်။ ဒီစိတ်ဝေဒနာကို ဘယ်လိုပျောက်ကင်းအောင်ကုသမလဲ။ သူရော ကျွန်မပါ အဖြေရှာခဲ့ကြတယ်။ ဒီလိုစိတ်ပူပန်မှုဖြစ်လာပြီဆို ခန္ဓာကိုယ်က ဖြစ်ပေါ်လာတဲ့တုန့်ပြန်မှုတွေဟာ အန္တာရယ်တစ်ခုကြုံတွေ့ရပြီဆို ဖြစ်ပေါ်လာတဲ့ ဓာတ်သဘာဝတွေပဲဖြစ်ပါတယ်။သက်ရှင်ဖို့အခွင့်ပေးတဲ့ တိုက်မလား ပြေးမလား ( Fight or Flight) အခြေအနေဖြစ်ပေါ်နေခြင်းပေါ့။  

ကျွန်မက ဒီဗျာပါဒတွေကို ဘယ်လိုထိန်းချုပ်လဲဆိုရင် အသက်ရှုတယ်။ (Breath) ။ ရှင်းရှင်းလေးပဲ။ အခြေအနေတွေဟာ ငါထင်သလောက်ဆိုးတဲ့အရာတွေ မဟုတ်ဘူးလို့စဉ်းစားတယ်။ အသက်ရှုတယ်။ လူတွေက ငါ့ကို ဒီလောက်အရေးမထားပါဘူး။ ငါဖြတ်သန်းနိုင်တယ်လို့အားပေးတယ်။ အသက်ရှုတယ်။ အာနပါနလေ့ကျင့်ခန်းပေါ့။

ခရစ်ကတော့ ဒီလိုအကြံပေးတယ်။ 'ဒါ သိပ်ရိုးလွန်းတယ်လို့ ထင်ရတယ်။ ဒါပေမယ့် နက်နဲသိမ်မွေ့တယ်။ "ရှူး" လို့ ကျွန်တော်ပြောမယ်။ "ရှူး" ဆိုတာ ကျွန်တော့်အတွက်တော့ သိပ်အရေးပါတယ်။ ကျွန်တော့်ဦးနှောက်က ဘယ်လောက်ဆူညံတယ်ဆိုတာ ဆန်းကြယ်သလို ဖြစ်မိတယ်။ ဦးနှောက်တိုင်းက ဆူညံမှာပဲ။ အတွေးတွေဖြစ်နေတာကို။ ပြဿနာက ကျွန်တော်တို့ဘဝမှာ ဆင်းရဲဖြစ်ခြင်းအကြောင်းရင်းက ဒီဦးနှာက်ကဆူညံသံတွေ နားထောင်ပြီး လိုက်လုပ်တာ။ ဒီအသံတွေကို ကိုယ်ဘယ်သူဆိုပြီး သတ်မှတ်နေတာပဲ။ ဒါဟာ ဦးနှောက်ကပြုလုပ်တဲ့ ဆူညံသံတွေသာ ဖြစ်တယ်။ အဲဒါထက်ဘာမှ မပိုဘူး။ အဲဒါထက် ဘာမှမပြောဘူး။ ရှူး(ဆိုပြီး ဦးနှောက်ကအသံတွေကို ငြှိမ်းလိုက်) ဒါက ခင်ဗျားကို တောင်တော်အထောက်အကူပြုလိမ့်မယ်' တဲ့။




သူဟာ ဒီအကြံပေးချက်ကို တွေ့ဆုံမေးမြန်းခန်းတော်တော်များများမှာ ထည့်ပြောတတ်ပါတယ်။ ' ဒီဆူညံသံဟာ ပျောက်ကွယ်သွားလိမ့်မယ်။ ခင်ဗျားက အတွေ့အကြုံတစ်ခုရလိုက်မယ်။ ဒီလိုနဲ့ခင်ဗျားက ရှင်သန်ခြင်းလှိုင်းကို တကယ်စီးဖြစ်တယ်' လို့လည်း ပြောတတ်တယ်။ တရားထိုင်တဲ့ ကျွန်မအတွက် သိပ်နားလည်လွယ်ကူပြီး အကျိုးရှိတဲ့ အကြံပေးချက်ဖြစ်ပါတယ်။ တရားစကားနဲ့ပြောရမယ်ဆို ရုပ်နာမ်က သူ့ဘာသာသူဖြစ်ပျက်နေတာ။ အတွေးတွေက ငါမဟုတ်ဘူး။ သူ့ဘာသာသူဖြစ်လာပြီး ပျောက်ပြယ်သွားတယ်ဆိုတဲ့ အချက်နဲ့ ကိုက်ညီနေတာ တွေ့ရပါတယ်။

ဒါသိပ်အံ့သြစရာတော့ မဟုတ်ပါဘူး။သူဟာ ကတ်သလစ်ဘာသာဝင်အဖြစ်ကြီးပြင်းလာခဲ့ပေမယ့် ဘာသာအသီးသီးမှ ဘုရားများကို အသိအမှတ်ပြုကိုးကွယ်တယ်လို့ပြောသလို ဗုဒ ္ဓ္ဓ ဘာသာဆိုင်ရာ အတွေးအခေါ်များကို အတော်လေးစိတ်ဝင်စားတယ်လို့ သိရပါတယ်။ သူဟာ တရားထိုင်ခြင်းကို ကျင့်စဉ်အဖြစ်လေ့ကျင့်တယ်လို့ဆိုပါတယ်။
အကြောင်းအမျိုးမျိုးကြောင့် ဒဏ်ရာရလာတဲ့အခါ ဆေးနည်းအမျိုးမျိုးနဲ့ ပျောက်ကင်းအောင် ကြိုးစားကြတယ်။ ဆေးနည်းတွေ မျှဝေကြတယ်။ ဒဏ်ရာအတိမ်အနက်ပေါ်မူတည်ပြီး အနာနဲ့ဆေးတည့်ချင်မှတည့်မှာဖြစ်ပေမယ့် နာကျင်မှုခြင်းတူတဲ့အခါ လူတွေဟာ နီးစပ်သွားကြတယ်။ လူဘုံအလယ်မှာ ထိတ်လန့်တတ်တဲ့မိန်းမတစ်ယောက်ဟာ သူဘယ်လိုခံစားရလဲဆိုတာ နားလည်တယ်ဆို မရယ်စေချင်ပါဘူး။

ကိုယ်ချင်းစာတယ်ဆိုတာ အပြောလွယ်သလောက်ခက်တယ်။ ချောက်ထဲကျဖူးသူတွေသာ ဘယ်လိုခံစားရကြောင်း အကျယ်ချဲ့ပြောစရာမလိုဘဲ နားလည်နိုင်ကြတယ်။ သူ့ရဲ အားနည်းချက်ကို ဖွင့်ပြောရဲမှုကို လေးစားတယ်။ ပြဿနာကို ချဉ်းကပ်ဖြေရှင်းနိုင်စွမ်းကို သဘောကျတယ်။ ဒါကြောင့် သူဟာ ယောက်ျား၊မိန်းမတွေ သားရေကျစရာ လိင်တစ်ခုသာမဟုတ်ဘဲ ခံစားတတ်တဲ့နှလုံးသားရှိတဲ့၊ ဉာဏ်ရည်မြင့်တဲ့လူတစ်ယောက်ဖြစ်ပါတယ်လို့ ပြောချင်တယ်။ 

ရိုးသားစွာ ဝန်ခံမှုပါ။ အဲဒီလူတစ်ယောက် စိတ်အားငယ်နေချိန်မှာ အားပေးချင်တယ်။တုန်လှုပ်နေတဲ့ သူ့လက်ကို ထွေးကိုင်လို့ ' ဘာမှ အရေးမပါဘူး။ အဆင်ပြေသွားမှာပါ' လို့ ပြောချင်တယ်။ မနီးမဝေးက ပြုံးကြည့်ရင်း 'အဆင်ပြေတယ် သိလား။ အောင်မြင်တယ်' ဆိုတာကို အသံမဲ့ဖော်ပြချင်တယ်။ အန္တာရယ်တွေကြုံတဲ့အခါ သူဘယ်လောက်ခွန်အားကြီးပါစေ သူ့ရှေ့မှာ ရပ်ကာ သူ့ကို ကာကွယ်လို့ သူ့ကိုစိတ်လုံခြုံမှုပေးနိုင်သူ ဖြစ်ချင်တယ်။ ကံနည်းသူမို့လည်း မိတ်ဆွေအဖြစ်နဲ့တောင် ဒီအခွင့်အရေးတွေ မရနိုင်ဘူးဆိုတာ လက်ခံရတာလောက် ဝမ်းနည်းစရာကောင်းတာ ဘယ်မှာရှိတော့မလဲနော်။

လူတစ်ယောက်က တစ်ယောက်ကိုနားလည်နေပေမယ့် တစ်ယောက်ကတော့ အဲဒီလူအသက်ရှင်နေပါတယ်ဆိုတောင် မသိဘူးတဲ့။ ကြေကွဲနာကျင်ခြင်းတွေကိုလည်း သူပြောသလို 'ရှူး' ဆိုပြီး ငြှိမ်းလို့ရရင် သိပ်ကောင်းမှာပဲ။ ခက်တာက လူမိုက်စင်စစ်ရယ်ပါ။ ချစ်ခြင်းနဲ့ ကြေကွဲခြင်းကို တစ်လှည့်စီ စားသုံးကာ။ တစိမ့်စိမ့်လွမ်းဆွတ်ရခြင်းကို အရသာခံချင်နေသေးတာ။ အလဟာသတဲ့လား။ ရယ်စရာတဲ့လား။ ဘာပဲပြောပြော သူဘယ်တော့မှ မသိနိုင်တဲ့ အဝေးကလူရဲ့ချစ်ခြင်းတွေက ငြိမ်းအေးပါတယ်ကွယ်။ ။

မယ့်ကိုး

10 July 2018

ယောက်ျားပီသတယ် ဆိုရာဝယ်



နိုင်ငံပဲပျက်ပျက်၊ ကမ္ဘာပဲကြေကြေ၊ ကောင်းကင်ပဲပြိုပြို Exo, BTS စတဲ့ kpop ဖန်တွေ၊ ခီဖန်၊ ဒေါင်းဖန်၊ စိုင်းစိုင်းဖန်၊ လုလုအောင်ဖန်၊မအေးသောင်းဖန် စတဲ့ idol fan တွေက သူတို့ချစ်သူတွေကို အသည်းအသန်၊ စွမ်းစွမ်တမံ ကာကွယ်ပေးနေဦးမှာပဲလို့ ထင်မိတယ်။ ရင်ထဲရှိရာ ထထပြောတတ်သူပြီး တစ်နှစ်မှာ ဆယ်လလောက်ပျောက်တတ်သူ ကိုယ်လည်း လေလောကီသားပေမို့ တစ်ခါတစ်လေတော့ အဖွဲ့ဝင်တစ်ယောက်ဖြစ်ချင်မိတယ်။ ZTao, ဒေါင်း၊ ရဲတိုက်တို့ကို တစ်ချိန်လုံးချစ်ကြောင်းပြောနေသူတွေကိုလည်း အားကျမိတာကြောင့်လည်း Chris Evans ကို ပွဲထုတ်ချင်မိတယ်။ ဆိုင်သူရှိတယ်ဆို မင်းသားကအစ မကြိုက်တတ်တဲ့ကိုယ့်အဖို့ သူ့ရည်းစားသစ်မရခင်အထိ သူဘယ်လောက်ချစ်စရာကောင်းပုံကို ပြောမယ်လို့ စိတ်ကူးထားပါတယ်။ (ဗိသုကာအကြောင်း၊ စာကြောင်းပေကြောင်းလည်း ပြောမှာပါ။ But Mission is Chris. ^~* )

သူဟာ မိဘမေတ္တာ၊ မောင်နှမ ချစ်ခြင်းတွေကြားမှာ ပြည့်စုံကောင်းမွန်စွာကြီးပြင်းခဲ့သူ ဖြစ်ပါတယ်။ ဝါသနာနဲ့စပ်အပ်တဲ့အလုပ်ကိုလည်း အခက်အခဲအတားအဆီးတွေမဲ့စွာ လုပ်ခွင့်ရပြီး အောင်မြင်မှုရလာသူပါ။ အထက်တန်းကျောင်းပြီးတဲ့အခါ ရုပ်ရှင်အေဂျင်စီတစ်ခုက အလုပ်လျှောက်ပြီး အလုပ်ရ၊ အဲဒီမှာခဏလုပ်ရင်း ဟိုကဒီကခေါ်ရိုက်ပြီး နောက်မင်းသားဖြစ်လာတဲ့သူဆိုတော့ အတိတ်ကံကောင်းသူလို့ ပြောနိုင်ပါတယ်။ နောက်တခြားသူတွေလိုချင်လွန်းလို့ လျှောက်ကြတဲ့ Caption America ဇာတ်ကောင်ကို ဇာတ်ကားကိုးကားတောင် ချုပ်ရမှာဆိုပြီး ငြင်းတာတောင် Marvel က လက်မခံဘဲ သုံးခါတိုင်တိုင် ကမ်းလှမ်းခဲ့တာပါ။နောက်ဆုံး ရောဘတ်စ်ဒေါင်နီ ဂျူနီယာက ရိုက်ပါဆိုပြီးပြောမှ ၆ ကားနဲ့အပြီး စာချုပ်မယ်ဆိုမှ လက်ခံခဲ့သူလည်း ဖြစ်ပါတယ်။ ဒီမှာ ဘာဖြစ်လို့ငြင်းခဲ့တာလဲဆိုရင် ကျော်ကြားမှုကို ဒဏ်ကို စိုးရွံ့ခဲ့တာကြောင့်လို့ သူကဆိုပါတယ်။

သူက အလုပ်လုပ်နေရတာ ကိစ္စမရှိဘူး။ စာနယ်ဇင်းဆွေးနွေးပွဲတွေရှိရင် စိုးရိမ်မှုကြောင့်ကြစိတ်ဖြစ်တယ်လို့ ပြောတယ်။ 'ဒါတကယ့်ကို ရင်တုန်ပန်းတုန်ဖြစ်စရာပဲ။ ကိုယ့်မိသားစု၊ကိုယ့်လူတွေမှာ ရှိနေရင်း လုံခြုံရေးတွေလူတွေအကုန်ရှိတဲ့ ကြောင်တောင်တောင်ကားရပ်စရာနေရာမှာ ရပ်လိုက်ရတယ်။ ရုတ်တရက်ပဲ သက်သောင့်သက်သာရပ်ဝန်းက ထွက်လိုက်ရတယ်။ အဲဒါထူးဆန်းတယ်။ ဒီကိစ္စသေးသေးလေးက လူကို စိတ်ရှုပ်စေတယ်ဆိုတာ' တဲ့။

ခရစ်က ပြောဖူးတယ်။ 'ကော်ဇောနီပေါ်လမ်းလျှောက်ရတာ ဘယ်လောက်ကြာမှာလဲ အလွန်ဆုံး နာရီဝက်ပေါ့။ ဒါပေမယ့် အဲဒီနာရီဝက်ဟာ ကျွန်တော့်အတွက်တော့ မီးသွေးခဲပူပူမှာ လျှောက်ရတဲ့ နာရီဝက်ပါ'တဲ့။ လူတွေ၊ကင်မရာတွေဒဏ်ကို သူဟာ အဲဒီလောက်ထိခံစားရပါတယ်။ ပြီးတော့ သူဟာ စာနယ်ဇင်းတွေ့ဆုံပွဲတွေကိုလည်း မကြိုက်ပါဘူး။ 'ဒါက တစ်ယောက်ချင်းမေးတာလို မဟုတ်ဘူး။ အင်တာဗျူးက အခန်းထဲမှာ ကိုယ်ကထိုင်နေမယ်။ သူတို့က တစ်ယောက်ပြီးတစ်ယောက်မေးမယ်။ အဲဒါကို တစ်နေကုန်လုပ်နိုင်တယ်။ အရည်ပျော်ကြမသွားဘူး။ ဒါပေမယ့် စာနယ်ဇင်းတွေ့ဆုံပွဲတွေက တကယ်ဖိအားများတယ်။ လူလယ်ခေါင်မှာ ကိုယ်က။ စစ်တပ်တစ်တပ်နဲ့တိုက်မယ်ဆို သူတို့ကို တန်းစီပြီး တစ်ယောက်ချင်းစီပဲ တိုက်နိုင်မယ်။ အခုသူတို့က ပတ်ပတ်လည်ဝိုင်းတိုက်တာ။ ခံရရော' လို့လည်း ဆိုခဲ့တယ်။



credit: Gettyimage 
 


သူဘာဖြစ်လို့ ဒီလိုသည်းမခံနိုင်တာလဲဆိုတဲ့အကြောင်းကိုလည်း ရှင်းပြတယ်။ 'ကိုယ့်အလုပ်ကို စိတ်ဝင်စားတဲ့သူတွေနဲ့စကားပြောရတာ ကောင်းတယ်။ ခပ်တုံးတုံးအကြောင်းတွေနဲ့အသုံးမကျတဲ့မေးခွန်းတွေကို ကိုယ်ကအရေးစိုက်သလိုလုပ်ပြီး ပြန်ဖြေရတဲ့အခါ ပေါက်ကွဲမိတယ်။' တဲ့။ ဒါက လူတိုင်းလိုလိုဖြစ်နေကျပါပဲ။ ဒါပေမယ့် သူ့လုပ်ဖော်ကိုင်ဖက်အချို့အတွက်တော့ နားလည်ဖို့ခက်ကြတယ်။

'အဲဒါတကယ်ရယ်ရတယ်။ သူက တကယ့်ကိုအေးအေးလူလူသမား၊ အပေါင်းအသင်းတွေနဲ့သွားရလာတာ၊ လူတွေကြားနေရတာလည်း ကြိုက်တယ်။ ဒါပေမယ့် စာနယ်ဇင်းလုပ်တော့မယ်ဆို၊ အလုပ်နဲ့ပက်သက်ပြီး စကားစစ်ထိုးရတော့မယ်ဆို ခြောက်ခြားနေတော့တာပဲ' လို့ဆိုကြတယ်။

ရောဘတ်စ် ဒေါင်နီက ဂျင်မီကင်မဲလ်အင်တာဗျူးမှာ ' ကျွန်တော်တို့က အော်ဒီကားထဲဝင်ရမှာ။ အဲဒီမှာ သူက ဘာလုပ်ရမှန်းမသိဘူး။ အစ်ကို အရင်ဝင်မလား၊ ကျွန်တော်အရင်ဝင်ရမလားမေးနေလို့ ' ဟေ့ကောင်၊ ယောက်ျားလိုနေ' လို့ ပြောရတယ်ဆိုပြီး ခရစ်အကြောင်းကို ဆိုဖူးတယ်။ အဲဒီအင်တာဗျူးကြည့်ပြီး 'toxic masculinity' ဆိုတဲ့ ဝေါဟာရကို ပိုနားလည်မိတယ်။ ယောက်ျားလိုနေဆိုတာ ဘာကိုပြောတာလဲ။ တကယ်က စက်ရုပ်လိုနေလို့ ပြောသင့်တာ မဟုတ်လား။

အရပ်မြင့်မြင့်၊ ခန့်ခန့်ညားညား ကျားကိုးစီး စားမကုန်တဲ့ ယောက်ျားတစ်ယောက်က လူမှုဆက်ဆံရေးဆိုင်ရာမှာ  စိုးရိမ်ကြောင့်ကြစိတ် (social anxiety) ရှိတာကို တွေ့ရတဲ့အခါ လူတွေက ရယ်ကြတယ်။ ယောက်ျားလည်း လူပဲမို့ ပတ်ဝန်းကျင်စိမ်းနဲ့ကြုံတဲ့အခါ လူတွေက ကိုယ့်ကိုဝိုင်းကြည့်အကဲခတ်နေကြတဲ့အခါမှာ ဘာလုပ်လို့လုပ်ရမှန်းမသိ၊ ခြေမကိုင်မိလက်မကိုင်မိ ဖြစ်တတ်ပါတယ်။ ဒါကို ရယ်စရာလှောင်စရာလုပ်နေကြတာဟာ မသင့်တော်ပါဘူး။ မဖြစ်သင့်ပါဘူး။ ရက်စက်မှုပါပဲ။

ယောက်ျားဆို ဘာလုပ်လုပ်ဘာဖြစ်ဖြစ် စိတ်ဓာတ်ကြံ့ခိုင်နေရမယ်ဆိုတာ မှားယွင်းတဲ့တွေးခေါ်မှုပါပဲ။ ကလေးဘဝတည်းကစလို့ ယောက်ျားဆို မငိုရဘူး။မပျော့ညံ့ရဘူးဆိုကာ  ယောက်ျားရဲ့ စိတ်ခံစားရတာတွေကို ထုတ်ဖော်မပြောစေချင်ကြဘူး။ မမြင်ချင်ကြဘူး။ ယေကျ်ားစိတ်ဆိုတာ တစ်ချိန်လုံးခိုင်မာတော့င်တင်းနေရမယ်လို့ ခံယူထားရကြတယ်။ ယောက်ျားဆိုတာ ပြဿနာကို စကားနဲ့ မပြောဘဲ လက်နဲ့အကြမ်းဖက်ဖြေရှင်းတတ်ကြတယ်။ ဒါယောက်ျားသဘာဝဆိုပြီး မှားယွင်းလက်ခံထားကြတဲ့ အဆိပ်အတောက်ဖိုသဘာဝအမြင်သာ ဖြစ်ပါတယ်။

ယောက်ျားစိတ်ကို အရုပ်လို၊ အရိုင်းလို၊ ဘုရားလို ကန့်သတ်ချင်တဲ့ သဘာဝကြောင့် စိတ်ဆင်းရဲမှုကြုံလာတဲ့အခါ ယောက်ျားတွေဟာ ဘယ်သူ့ ကို ရင်ဖွင့်လို့ ဘယ်လိုဖြေရှင်းရမလဲဆိုတာ နားမလည်ကြတော့ဘူး။ ကိုယ်ဘယ်လိုခံစားနေရလဲ။ ဘာကြောင့်ခံစားနေရလဲ။ ခံစားချက်ကို ဘယ်လိုကုစားမလဲ အဖြေမရှာတော့ဘူး။ အရက်သောက်တယ်။ နည်းမျိုးစုံနဲ့အာရုံလွှဲတယ်။ ထုံပေအောင် နေတယ်။ ကိုယ့်ကိုယ်ကိုယ်မသိယောင်ဆောင်တယ်။ မာကျောအောင် ကြိုးစားရင်း ရက်စက်တတ်လာကြတယ်။ ဒီလိုကိုယ့်ကိုယ်ကိုယ်ညှင်းပန်းခြင်းဒဏ်ကို ဒီယောက်ျားတွေပဲ ခံရပြန်တယ်။ သူတို့ရဲ့လူသိမခံတဲ့ စိတ်ဒဏ်ရာဟာ ပျောက်ကင်းဖို့မဖြစ်နိုင်တော့ဘူး။ ရလာဒ်ကတော့ ယောက်ျားတွေရဲ့ ကိုယ့်ကိုယ်ကိုယ်သတ်သေမှုက မိန်းမတွေထက်များတယ်။ လူသတ်မှု၊ အကြမ်းဖက်မှုကျူးလွန်တာလည်း ယောက်ျားတွေက အများစုဖြစ်နေတယ်။

ယောက်ျားပီသတယ်ဆိုတာ ဘာလဲလို့ မေးစရာဖြစ်လာတယ်။ ယောက်ျားလည်း လူတစ်ယောက်ပဲမို့အားငယ်တတ်တယ်။ တစ်ချို့အရာတွေကို ကြောက်ရွ ံ့တတ်တယ်။ တစ်ချို့အရာတွေမှာ စိတ်လှုပ်ရှားတတ်တယ်ဆိုတာ လူတိုင်းလက်ခံနားလည်တတ်မယ့်အချိန်ရောက်ဖို့ ဘယ်လောက်စောင့်ရဦးမှာလဲ။ ခရစ် အက်ဗင်စ်ကတော့ သူ့အငုံစိတ်၊ကြောင့်ကြစိတ်၊စိုးရိမ်ဗျာပါဒတွေကို လူရယ်ခံရသည့်တိုင် တရားဝင်ပြောကြားခဲ့တဲ့ တကယ့်ယောက်ျားစစ်ဖြစ်ပါတယ်။

ခရစ်က Caption America ဇာတ်ကောင်ကို ရွေးချယ်မှု၊သူ့ကြောက်စိတ်နဲ့ပက်သက်ပြီး ' ကိုယ်အကြောက်ဆုံးအရာတွေဟာ ကိုယ်အလုပ်သင့်ဆုံးအရာဖြစ်နိုင်တယ်။ ကိုယ်ကိုယ့်ကိုယ်လုပ်ဖို့တွန်းအားပေးသင့်တဲ့အရာ ဖြစ်မယ်။ ဒီလိုတွေးရင်းနဲ့တစ်ချို့အရာတွေဟာ ယုတ္တိတန်လာတယ်။' လို့ဆိုတယ်။

ဒီလိုပဲ ကိုယ်ဟာ ခရစ်အကြောင်းကို ပြောရတာ အရေးပါတယ်။ အဓိပ္ပါယ်ရှိတယ်လို့ထင်မိတယ်။ နတ်ဘုရားနဲ့ယှဉ်သတ်နိုင်တဲ့၊ စစ်တပ်တစ်တပ်လုံး ဖြိုခွင်းနိုင်တဲ့ ကြောက်စိတ်မဲ့သူလို ထင်ရတဲ့ ဇာတ်ကောင်ရဲ့နောက်ကွယ်က ယောက်ျားတစ်ယောက်ရဲ့ စိတ်လှုပ်ရှားတတ်မှုဗျာပါဒတစ်ခုကြောင်းကို လူတိုင်းသိသင့်တယ်လို့ ယုံကြည်မိတယ်။

ပြီးတော့ သူ ဒီစိတ်ဝေဒနာကို ဘယ်လိုတိုက်ထုတ်နေကြောင်းကိုလည်း အခါအခွင့်ကြုံရင် ပြောပြချင်ပါသေးတယ်။

မယ့်ကိုး


30 June 2018

မျက်ရည်ရဲ့ ဂုဏ်တော်အဖြာဖြာ

…………………………………………………
 The heart was made to be broken.
 - Oscar Wilde 
………………………………………………… 

နာမည်ကြီးလှတဲ့ အသည်းကွဲခြင်းနဲ့ ကျွန်မ ထိပ်တိုက်တွေ့ချိန်ပေါ့။ မာရေကျောရေနိုင်လှတဲ့ စိတ်ထားပိုင်ရှင် မိန်းမတစ်ယောက်ရဲ့ နှလုံးရည်စမ်းသပ်ခန်းဟာ အခုမှ စတင်ခဲ့တာ။ ‘ကိုယ့်ကိုယ်ကို ဂရုစိုက်စောင့်ရှောက်ပါလို့ ကျွန်မ မပြောတော့ဘူး။ ရှင့်မှာ စောင့်ရှောက် ယုယမယ့်သူ ရှိနေပြီမဟုတ်လား’လို့ ပြောကာ သူ့ဘဝထဲက ကျွန်မ ထွက်ခဲ့ပါတယ်။ ဘယ်ဆွေမျိုးမိတ်သင်္ဂဟာ အသုဘမှာမှ မငိုခဲ့တဲ့သူပါ။ဆွေးမြေ့ကြေကွဲဖွယ်ဘယ်ရုပ်ရှင်မှာမှ မျည်ရည်မဝိုင်းခဲ့သူပါ။ သူစိမ်းတွေအဆိုအရတော့ ကျွန်မဟာ စိတ်ခံစားမှုချို့ယွင်းနေသူပါတဲ့။ ဒါပေမယ့် လမ်းခွဲစကားအဆုံးမှာတော့ မငိုဘူးလို့ စိတ်မတင်းခင်မှာတင် မျက်ရည်တွေဟာ ရေတံခွန်စီးဆင်းသလို ဖြာကျလာခဲ့။ ဘုရားမလို့ ကံကြီးသီစွာပဲ ကျွန်မ မျက်ရည်တွေကို သူ မမြင်ခဲ့ပါဘူး။

 အော်စကာဝိုင်းပြောသလိုပဲ အသည်းနှလုံးဆိုတာ ကွဲကြေဖို့ ပြုလုပ်ထားခဲ့တာဖြစ်မှာပဲ။ ကျွန်မရဲ့ အသည်းနှလုံးဟာ ရင်ထဲက ပေါက်ထွက်ကာ တစ်စစီကြေကွဲလွင့်စင်သွားတယ်။ ဘဝဟာ ရုတ်ချည်းခေါက်ရိုးချိုးခံလိုက်ရတယ်။ ကောင်းကင်ကြည်ပြာဟာ ခဏအတွင်း မည်းမှောင်လာတယ်။ ကမ္ဘာကြီးရပ်သွားတယ်။ မီးတောင်ပေါက်ကွဲကာ ချော်ရည်ပူတွေ စီးဆင်းလာတယ်။ လေထုထဲမှာ ပြာပူမှုန့်တွေ ထူပြိန်းကာ အသက်မရှုနိုင်လောက်အောင် ဖြစ်လာတယ်။ အချိန်နာရီတွေဟာ အရည်ပျော်ပြီး ဆူပွက်အငွေ့ပျံသွားကြတယ်။ အသည်းကွဲသွားတဲ့အခါ လူတွေဘယ်လိုပြုမူတတ်ကြသလဲ။ ကျွန်မကတော့ အစာမစား၊ရေမသောက်ဘဲ တစ်ညလုံး ငိုခဲ့တယ်။

ချစ်သူကို စွန့်လွှတ်ရခြင်း၊ အိပ်မက်တွေ ပျက်စီးသွားခြင်း၊ မာနကို အထိနာခြင်း၊ ယုံကြည်မှုအလွဲသုံးစားပြုခံရခြင်း၊ ကိုယ့်ကိုယ်ကိုယ်လေးစားစိတ်ကို မေးခွန်းထုတ်ရခြင်း။ လူဖြစ်ရခြင်းအကျိုးကို ခါးသီးမေးခွန်းထုတ်မိခြင်း။ သူကတော့ သောကကင်းဝေးစွာ ပျော်နေပါလိမ့်မယ်။ ကျွန်မလည်း ကြိုးစားရပ်တည်ခဲ့ပါတယ်။ နောက်တစ်နေ့မထနိုင်လောက်အောင် ခေါင်းအုံကိုက်ခဲနေပေမယ့် ရုံးကိုတော့ အရောက်သွားခဲ့ပါရဲ့။ ဒါပေမယ့် အလုပ်မလုပ်နိုင်ဘဲ သန့်စင်ခန်းသွားကာ တစ်နေ့လုံးငိုခဲ့သလို နောက်တစ်နေ့ ဆေးခွင့်ယူကာ အိပ်ရာထဲမှာ လှဲနေခဲ့ရ။ အဲဒီမှာ ဆင်မြူရယ်ဂျွန်ဆင်ပြောတဲ့ စကားတစ်ခုကို သတိရမိလေတာ။

‘ဝမ်းနည်းခြင်းဟာ စိတ်ဝိညာဉ်ရဲ့ သံချေးမျှသာပဲ။ လှုပ်ရှားသက်ဝင်တက်ကြွတဲ့အလုပ်မှသာ စိတ်ဝိညာဉ်ကို သန့်ရှင်းတောက်ပြောင်စေလိမ့်မယ်’တဲ့။ ကျွန်မ အခုလုပ်နိုင်တဲ့ လှုပ်ရှားမှုကတော့ တစိမ့်စိမ့်မျက်ရည်ကျခြင်းရယ်သာ။ ဒီလိုသာ မငိုရဘူးဆို ကျွန်မ ရူးသွားမလားလို့လည်း တွေးမိရဲ့။ ရှိတ်စပီးယားကလည်း ပြောခဲ့ဖူးတယ်မဟုတ်လား။ “To weep is to make less the depth of grief.”တဲ့လေ ။ ‘ပူဆွေးခြင်းအတိမ်အနက်ကို လျော့ပါးစေဖို့ ရှိုက်ငိုပါ’လို့ ဆိုတယ်မဟုတ်လား။ ဟုတ်ကဲ့။ ကျွန်မ အားပါးတရငိုခဲ့ပါတယ်။ အခုအချိန်မှာ ပြန်တွေးကြည့်တော့ ဒီအဖြစ်တွေဟာ ရယ်စရာကောင်းနေပေမယ့် ဟာသတော့ ဖြစ်မလာပါဘူး။

သုတေသနမှတ်တမ်းတွေအရ ငိုကြွေးခြင်းဟာ လူကို အကျိုးများစွာပြုတယ်တဲ့လေ။ ဝမ်းနည်းလို့ ကျတဲ့မျက်ရည်ဟာ တစ်ခုခုထိခိုက်မိလို့ ကျတဲ့ မျက်ရည်နဲ့ မတူပါဘူးတဲ့။ ၁၉၅၇ ခုနှစ်တည်းက စမ်းသပ်ချက်များအရ ဝမ်းနည်းလို့ကျတဲ့ မျက်ရည်ထဲမှာ စိတ်ဖိစီးစေတဲ့ဟော်မုန်းတွေ ၊ အမျိုးမျိုးသော အဆိပ်အတောက်တွေ ပါဝင်ပါတယ်တဲ့။ အသည်းကွဲလို့ ကျခဲ့တဲ့ မျက်ရည်များနဲ့အတူ အစိတ်အတောက်တစ်ချို့၊ စိတ်ဖိစီးမှုဟော်မှုန်းတစ်စိတ်တစ်ပိုင်းလည်း ခန ္ဓာကိုယ်ထဲက ထွက်သွားတာ ဝမ်းသာစရာပဲနော်။ ပြီးတော့ ငိုကြွေးခြင်းဟာ ကိုယ်တွင်းမှာရှိတဲ့ မန်ဂနိဓာတ်ကိုလည်း လျော့ကျစေပါတယ်တဲ့။ ဒီဓာတ်ဟာ စိတ်နေစိတ်ထားအပေါ် သက်ရောက်မှုရှိပြီး သွေးထဲမှာထက် မျက်ရည်ထဲမှာ ပါဝင်မှုနှုန်း သုံးဆယ်ဆ ရှိတယ်တဲ့။ ဒါကြောင့် ကျွန်မ ငိုခဲ့တာ မမှားပေဘူး။ ငိုကြွေးလိုက်ခြင်းကြောင့် ကျွန်မစိတ်ဟာ အနည်းငယ်သက်သာရာ ရလာခဲ့တာ အမှန်ပါပဲ။

အဆုံးမှာတော့ မျက်ရည်များဟာ ကျွန်မကို စိတ်ပိုင်းဆိုင်ရာ၊ ရုပ်ပိုင်းဆိုင်ရာ သက်သာပြေငြိမ်းစေခဲ့တယ်။ စဉ်းစားကြည့်ပါလေ။ ရှင်မွေးနွန်းဟာ မင်းနန္ဒာရဲ့ သေဆုံးကြောင်း သတင်းကြားပြီးပြီးခြင်း နှလုံးခုန်ရပ်သေဆုံးသွားတာ မငိုနိုင်ခဲ့လို့များလား။ ကျွန်မကတော့ မသေခဲ့ဘူးရယ်။ အသည်းကွဲခဲ့ပေမယ့် ဆက်လက်ရှင်သန်ရဦးမယ်။ ရူးပတ်ဘရွတ်ခ်ပြောခဲ့တဲ့ ဆိုရိုးစကားလည်း ရှိတယ်မဟုတ်လား။ ‘ မင်းအတွက် အချစ်တွေသေဆုံးသွားတဲ့အခါ၊ ငါသေသင့်တယ်လို့ ငါတွေးခဲ့တယ်။ အချစ်က သေသွားခဲ့တယ်။ သူတစ်ခုတည်းပဲ။ တစ်ယေက်တည်းပေမယ့် အရမ်းကို ထူးဆန်းစွာပဲ ငါ အသက်ရှင်နေတယ်။’ တဲ့။

 …………………

 I thought when love for you died, I should die. It's dead. Alone, most strangely, I live on.
 - Rupert Brooke
 ………………… 

ကျွန်မလည်း အသက်ရှင်နေပါဦးမယ်။ အသည်းကွဲခြင်းရဲ့ ကျေးဇူးတော်အနန္တဖြင့်လေ။

 မယ့်ကိုး